Author Archive

Camino na die Suidpunt van Afrika?

Written by Frederick on . Posted in Nuus

Communitas oorweeg om ‘n Pelgrimstog na die Suidpunt van Afrika te organiseer. Die gedagte is om soos die bekende Camino de Santiago ‘n tradisie te begin waar pelgrims na die Suidpunt van ons kontinent stap. Met ‘n eerste navraag het daar heelwat positiewe reaksies na vore gekom. Is daar van Communitas se vriende wat sou belangstel om deel te neem aan ‘n eerste stap van die Worcestor omgewing deur die Overberg na die bekende ligtoring by Agulhas? Van die gemeentes op die pad het reeds aangetoon dat hulle belangstel om hulle kerke oop te maak en ons te verwelkom.

Wat is daar vir die kerk en gemeentes uit die 2014 verkiesing te leer?

Written by Frederick on . Posted in Gemeentes, Gestuurdheid, Leierskap, Padlangs met gemeentes, Transformasie, Uncategorized

Ek waag vanaand! Daar is al heelwat ontleding oor die uitslag van die verkiesing gedoen. My bydrae probeer nie op die uitslag fokus nie maar op die prosesse in en rondom die verkiesing om te probeer verstaan wat in ons land aan die gang is.
1. Die persentasie kiesers wat gestem het, was wel ‘n bietjie laer as die verkiesing van 2009, maar het nogtans die verwagting van die OVK ver oortref. Die proses is gekenmerk deur lae vlakke van geweld as in ag geneem word hoe vel die verkiesingstryd was. Iemand het opgemerk dat daar minder geweldadige insidente was as in die VSA se laaste verkiesing! Die mense wat voorspraak gedoen het om stembriefies te bederf het nie hond haaraf gemaak nie. Die getal bedorwe briefies was klaarblyklik min of meer dieselfde gewees as met vorige verkiesings. Sou ‘n mens kon aflei dat mense oor ‘n breë spektrum genoeg omgee en glo in die toekoms van ons land dat hulle in groot getalle moeite gedoen het om te gaan stem? Indien ek reg is, wil ek voorspel dat gemeentes wat net vir eie belang en voortbestaan aanspraak maak op mense se ondersteuning en lojaliteit, minder en minder ondersteuning gaan kry.

2. Dit wil lyk asof Suid Afrikaners ‘n behoefte het aan publieke deelname van prosesse of byeenkomste van nasionale belang. Die Wereldbeker het dit in 2010 gewys, Madiba se begrafnis en nou weer met die deelname aan die verkiesing. Nie alleen het ‘n verassende persentasie mense deelgeneem nie, maar die oorweldigende kommentaar was dat mense dit “geniet” het om te stem. Ek kan my aan min ander lande indink wat mense met soveel vreugde stem en dit as lekker beskryf. Kan dit wees dat daar ‘n behoefte by Suid Afrikaners is om mekaar te ontmoet in publieke ruimtes waar ons saam deelneem aan prosesse? Ek onthou nog baie goed hoe Suid-Afrikaners mekaar omhels het toe Thabalala daardie eerste doel in die 2010 wêreldbeker geskop het. En die eerste keer toe die Blou Bulle in Soweto gaan rugby speel het, en nie net rugby gekyk het nie, maar heerlik gekuier het in Wilakazistraat se restaurant.

‘n Paar weke terug het ek dieselfde ervaar met die optog in Kaapstad voor die verkiesing. Ek hoor van ‘n groep predikante wat in Parow ‘n gesamentlike diens op Palmsondag gehou het waar ‘n tiental gemeentes van verskillende kante van die spoorlyn saam kerk gehou het en hoe lekker dit vir almal was toe ‘n paar honderd mense na die kerk op die grasperk saam geëet het.

Is dit nie nou tyd om uit ons woonbuurtes te kom en saam publieke prosesse te ondersteun wat die eenheid tussen Suid-Afrikaners verder bou nie?

 

Die gebed wat alles sê

Written by Frederick on . Posted in Gebed, Gebede

My pa is ‘n lyer van Parkinson se siekte, nou almeer as ‘n dekade. Pa  is aan die verkeerde kant van tagtig. Die sieke eis sy tol. Hy word tuis deur my ma versporg.

Vanoggend het ek en Anika ingeloer. Dit was nie ‘n goeie oggend vir hom nie. Hy is moeg en het in die bed gebly en sommer daar ontbyt geëet. Om op te staan word al hoe meer van ‘n inspanning. Hy slaap groot dele van die dag en voel skuldig daaroor dat hy so min doen. My ma verseker hom dat hy maar mag rus, hy het hard genoeg in sy lewe gewerk om nou maar te kan rus.

Sy gaan haal die ontbyt en bring dit kamer toe om hom te voer. Die ontbyt is sorvuldig voorberei met presies wat hy nodig het, So berei sy elke ete met sorg voor. Sy vra of hy sal bid vir die ete? Hy maak sy oe toe en stadig bid hy met ‘n verbasende helder stem:

Vader wat in die Hemel is…daar is ‘n lang stilte
én ook hier by ons op aarde is…
dankie, dankie…dankie
amen

Daar was nie meer  woorde nodig nie, die gebed het alles gesê

‘n Ode aan my VG kollegas

Written by Frederick on . Posted in Padlangs met gemeentes, Transformasie

Verlede week was ek by ‘n geleentheid waar ‘n senior joernalis verwys het na die bekende essay van Samuel Scudder  “Take This Fish and Look at It,”  Dit is die verhaal van ‘n jong entomoloog (insektekundige)  wat van sy professor die opdrag kry om na ‘n vis te kyk en sy waarnemings neer te skryf.  Aanvanklik dink hy dit is ‘n maklike opdrag en skryf hy vinnig neer wat hy waarneem. Die professor in nie tevrede nie en hy moet weer na die vis kyk, sonder dat die professor tevrede is. Toe neem die porefessor die vis weg en vra hom om sy waarnemings neer te skryf  noudat hy nie meer fisies na die vis kan kyk nie. Die student begin noodgedwonge op ‘n ander manier “kyk” en nadink oor wat hy gesien het, en maak ontdekkings oor die vis wat hy nooit gedink het moontlik is nie.  Dit is by hierdie dieper kyk, wanneer ‘n joernalis gebore word, het die senior joernalis aan die nuwelinge gese.  Ek dink dit is goeie raad vir hoe ons uit die verskillende kerke na mekaar kyk.

Ons het nou ‘n 3-dag evangelie nodig

Written by Frederick on . Posted in Leierskap, Padlangs met gemeentes, Transformasie

Die optog van Distrik Ses tot by Parlement in  Kaapstad op Stil Saterdag was  ‘n baie hoopvolle dag vir almal wat vrede en geregtigheid in ons land soek.

stil-saterdagDit is vir my betekenisvol dat die optog op stil Saterdag was. Ons glo in ‘n 3dag evangelie, Goeie Vrydag-wanneer ons die kruisiging herdenk. Ons ontmoet dan dié God van deernis en opofferende diens. Op Paassondag herdenk ons die opstanding, die leë graf en is ons saam met Maria aan die soek na die liggaam van Jesus en kry ons net die doeke. Sonder stil Saterdag-die dag van die dood, sou die ander twee nie dieselfde betekenis kon dra nie. Op stil Saterdag slaan die werklikheid van die dood ons op die krop van ons maag. Golgota se drama lê nou agter ons en die finaliteit van die dood en die stilte daarvan ruk ons eintlik tot stilstand. Die drama van pase is geen speel-speel sprokie met ‘n gewaarborgde uitkoms nie. Op stil Saterdag het Christus die  dood betree. Ons kan nie anders as om dit vierkantig in die oë te kyk nie. Die dood is eenvoudig deel van die lewe en op stil Saterdag word ons daarmee gekonforteer. Gelukkig is dit tussen Goeie Vrydag en Paassondag, die kruis en die opstanding.

Ons neem afskeid van Ds Winston Samuels

Written by Frederick on . Posted in Nuus

Ds Winston Samuels, leraar van die VGK Wynberg, word vandag in Wellington begrawe. Ds Samuels was ‘n gewaardeerde lid van die Communitas.

Raad en ons wil  graag op hierdie wyse hulde bring aan hom. Ons betreur saam met sy gemeente en familie die feit dat hy so vroeg van ons weggeneem is en dat

ons nie die pad verder saam kon loop nie.

Ds Winston Samuels het op Maandag 7 Oktober 2013 gesterf in die amp as leraar van die VGK Wynberg-gemeente wat hy vir die afgelope 4 jaar, sedert 2009 bedien. Hy het sy bediening as tentmaker begin in 2007 by die VGK gemeente, Marydale in die Noord-Kaap. In ’n artikel wat in Rapport verskyn het na sy bevestiging in Wynberg-gemeente, het hy genoem dat hy nooit kon dink dat hy van die klein plattelandse dorpie in Marydale na die gevestigde stedelike gemeente Wynberg beroep sou word nie.

 Vir sy naaste familie, die gemeente, sy kollegas en baie ander is dit met groot skok en leedwese dat ons so skielik van hom afskeid moes neem. Ons vertrou dat almal berusting sal vind in die ontfermende genade van die Here.

 

Die Begrafnisdiens vind plaas op Saterdag 12 Oktober 2013 om 10:00, besigtiging om 09:00, by VGK Huguenot-gemeente, Paarl. Die teraardebestelling vind plaas by die begraafplaas in Wellington.

Communitas ses jaar oud vandag

Written by Frederick on . Posted in Communitas Inligting, Dienste

logo-cmykOns is dankbaar vir die mylpaal en vir almal wat gehelp het om ons dienste aan gemeentes en predikante uit te bou.

Baie dankie aan elke gemeente wat ons vertrou het om saam met hulle die reis te onderneem.

Ons het die voorreg om hierdie werk (vir ons is dit ‘n roeping)  te mag doen in ‘n tyd wat die kerk baie groot uitdagings het.

Ons kyk hierdie uitdagings saam met die gemeentes, predikante en gemeenteleiers saam met wie ons werk, vierkantig in die oe met hoop

en verwagting dat die Gees wat ons as gemeentes vergader,  aan ons al die gawes en bronne sal gee wat ons nodig het om in hierdie tyd getrou te

wees aan ons roeping. Ons glo dit is ‘n onvoorwaarderlike belofte van God self.

Ons mag dalk saam foute maak, maar ons gaan nie hoop verloor nie, want dit is ‘n gawe wat ons ontvang en nie besit en daarom nie kan verloor nie.

Mag ons almal in die jaar wat voorle ons vrese oorkom en waag om deel te neem aan die deurbraak van die Koninkryk,

nie met mag nie maar in klein en groot dade van selfofferende diens.

Communitas is veel groter as die paar lede van die personeel- daar is talle kursusaanbieders, begeleiers, mentors skrywers en vriende wat saam

met ons die Communitas-familie vorm.  Aan julle almal baie dankie vir die heerlike saamwerk.