Author Archive

Dink jouself gelukkig

Written by Mariette Steyn on . Posted in Aktueel, Vrouelidmate

deur Pieter van Jaarsveld

Ons het in die laaste uitgawe gekyk na die mites oor wat jou gelukkig maak. Nou gaan ons vir die volgende paar uitgawes kyk na wat maak mens gelukkig. Hierdie aktiwiteite waaroor ons gaan gesels, kom nie uit populêre vrouetydskrifte nie. Nee, dit is deeglik nagevorste vaardighede en tegnieke en jy gaan verbaas wees dat die meeste van hierdie aktiwiteite reeds in die Bybel genoem word.

happy

Miskien kan jy onthou dat daar navorsing gedoen is om te vind wat maak mens gelukkig? Hierdie navorsers het vasgestel dat 50% van jou geluk geneties is. As jy ‘n befoeterde oupa gehad het, het dit ongelukkig ‘n invloed op jou; 10% van jou geluk hang van omstandighede af soos bv. jou man wat afgelê is, jou kind wat matriek gedruip het (is dit nog hoegenaamd moontlik?!), maar 40% lê in jou hande! Jy kan dus jou vlak van geluk opskuif, want dit gaan nie net jou verhoudinge verbeter nie, maar ook jou gesondheid en langer laat leef! Voordat ons verder gesels, bepaal eers jou geluksvlak
hier reg in die begin van die reeks:

GELUKSKAAL

Instruksies: Omsirkel die nommer op die skaal wat jy dink jou die beste beskryf. (Let op dat die betekenis van die nommers vir al hierdie items verskillend is)

1. Ek sien myself as:

1    2    3    4    5    6    7
Nie baie gelukkig baie gelukkig

2. As ek my met my tydgenote vergelyk, beskou ek myself as:

1    2    3    4    5    6    7
Minder gelukkig meer gelukkig

3. Sommige mense is oor die algemeen baie gelukkig. Hulle geniet die lewe ten spyte van wat gebeur. Hulle maak die beste van elke oomblik. Tot watter mate is dit beskrywend van jou?

1    2    3    4    5    6    7
Glad nie grotendeels

4. Sommige mense is oor die algemeen nie baie gelukkig nie. Alhoewel hulle nie depressief is nie, lyk hulle nooit regtig gelukkig nie. Tot watter mate
is dit beskrywend van jou?

1    2    3    4    5    6    7
Grootliks glad nie

Hoe om jou telling te bepaal:

Stap 1: TOTAAL Tel op Item 1: _____ +
Item 2: _____ +
Item 3” _____ + Item 4: _____ = _____

Stap 2: Jou gelukspunt = Totaal ÷ 4: ______
Datum: _____
Gelukspunt (na 3 weke): _____ Datum: _____
Gelukspunt (einde vd reeks): ______ Datum:_____

Jy sal sien dat die hoogste telling wat jy kan kry sewe is en die laagste een. Die gemiddeld van meeste mense is so tussen 4.5 en 5.5 en dié van studente so bietjie onder 5 terwyl meer volwassenes rondom 5.6 lê. As jy dus 5.5 kry, is jy so gelukkig soos 50% van die mense. As jy meer as 5.5 kry, is jy meer gelukkig as die gemiddelde persoon. Natuurlik is die uitdaging om hoër as 5.5 te kry en jou nuwe reis begin nou om dit moont-lik te maak! Toets jouself oor 3 weke en kyk of jy al verbeter het.

Na die reeks toets jou weer.

Ons gaan in hierdie reeks kyk na 12 aktiwiteite wat jou geluk kan verbeter. Pas sommer met elke uitgawe die een wat ons bespreek toe, maar aan die einde kan jy uit die 12, drie kies wat die beste by jou menswees pas.

GELUKSAKTIWITIEIT 1: DANKBAARHEID

Seligman, die Vader van Positiewe Sielkunde, het ‘n geluks-aktiwiteit aan ‘n aantal uiters depressiewe pasiënte geleer. Party van hulle was so erg dat hulle nie uit die bed kon opstaan nie. Hulle moes elke dag drie dinge neerskryf waaroor hulle dank-baar was. Eenvoudige goed soos: ”My seun het my vandag gebel; Ek het die boek wat my terapeut voorgeskryf het, gelees; “Ek het met bewondering na die sonsopkoms gekyk.”

Binne 15 dae het hulle van uiters ernstige depressie na ligte en matige depressie verander. Nie minder as 94% het verligting ervaar. ‘n Wonderlike bewys dat dankbaarheid geluk verhoog en selfs depressie verminder! Dis nie verniet dat die Bybel dankbaarheid beklemtoon nie! Gaan lees Fil. 4:4: “Verbly jou in die Here.” Sê jou mos dat wat die navorsing nou bewys, ‘n verskil in die lewe kan maak. Dis lankal deur die Bybel voorspel!

Dankbaarheid verskyn meer as 150 keer in die Ou en Nuwe Testament en die bevel om “dankbaarheid te toon” verskyn 33 keer. Martin Luther het
dank-baarheid as die basiese Christelike ingesteldheid beskou.

Om dankbaar te wees, is veel meer as om “dankie te sê”. Dit is om ‘n lewe van dankbaarheid te leef. Daar is gevind dat mense wat ‘n lewe van dankbaarheid lei, meer energie het, gelukkiger en meer hoopvol is, meer godsdienstig en meer vergewens-gesind, asook minder materialisties. Die gevolg is dat hulle minder depressief is, minder angstig, minder neuroties of minder alleen is. Maniere van dankbaarheid om jou geluk te laat
floreer.

1. Dink dankbaarheid! Dit is letterlik om jou alledaagse ervaringe in die lig te sien van hoe dankbaar jy is om dit te beleef. Wanneer jy jou baba aan die slaap sus, om te beleef hoe wonderlik dit is om hierdie klein prinsessie van die Koninkryk van God in jou hande te hou omdat sy aan JOU toevertrou is!

2. Dink elke dag aan drie dinge waarvoor jy dankbaar is. Waarom doen julle dit nie as gesin rondom die eettafel nie? Ander mense kry vir hulle ‘n “buddy” en dan vertel hulle elke dag vir daardie persoon waaroor hulle dankbaar is. Toe een van my kollegas deur ‘n moeilike tyd gegaan het, het hy elke dag vir my die drie dinge per epos gestuur waaroor hy daardie dag dankbaar was. Verander jou drie dinge na drie weke sodat jy nie daaraan gewoond word nie. Dink bv. oor jou gesin, na 3 weke oor jou werk, ens.

3. Dankbaarheid, selfs in die moeilikste omstandighede, help jou die stres en trauma beter hanteer, al is dit ook hoe moeilik!

4. Mense wat ‘n dankbare lewe lei, help ander ook meer. Soos jy weet, hoe meer jy gee hoe meer ontvang jy. Jou gevoel van geluk skiet die hoogte in.
Wees dus elke dag op die uitkyk hoe jy ander kan help wat nie het wat jy het nie. Dit kan soms net wees om in die gietende reën vir die koerantverkoper ‘n ou reënjas te gaan gee of vir die motorwag, wat in die verseggende hitte staan, ‘n koeldrank uit die winkel saam te bring in plaas van hom uit te jou dat hy bedel.

5. Dit is goed om dankbaarheid direk aan iemand te betuig, hetsy oor die foon, of in ‘n gesprek of per epos. Dink tog daaraan om dit soms vir jou predikant ook te sê as hy ‘n besondere boodskap, wat jou hart geroer het, gelewer het.

Volgende keer geluksaktiwiteit no 2!

Visbraai – 22 Februarie 2015

Written by Mariette Steyn on . Posted in Nuus uit gemeentes, Vrouelidmate

deur Yvonne Neethling

Sondag, 22 Februarie 2015 was dit weer tyd vir Langebaangemeente se jaarlikse visbraai. Die gemeente kom met hulle piekniekmandjies, gelaai met eetgerei en iets te drinke, om saam te aanbid en te eet. ‘n Paar geoefende manne braai 300 harders vanaf 15:00 en almal wat kan broodbak, kom met ‘n tuisgebakte broodjie, asook die konfytmakers se heerlike tuisgemaakte konfyte. Die aand word afgesluit met heerlike filterkoffie.

Hierdie jaar het die visbraai ook saamgeval met ons getuienismaand en Johan en Enna Dames van Pemba het ook saam met ons vis en brood geniet. Wat ‘n voorreg om hierdie besondere geleentheid te kon hou met die pragtige “voorstoep”-uitsig vanaf ons kerk en saal op die strandmeer.

APRIL interaksie

Vroue met Vlerke – Vrouedag

Written by Mariette Steyn on . Posted in Nuus uit gemeentes, Vrouelidmate

deur Yvonne Neethling

APRIL interaksie

Op Saterdag 9 Augustus 2014 het ons Vrouedag gevier. Die vrouediens het besluit om hierdie dag ‘n spesiale poging aan te wend om die vroue van ons gemeente, asook die vroue van ons omgewing, saam te bring om in geloof versterk te word, mekaar te leer ken, vir mekaar te bid en hande uit te reik na die persoon langs jou. Riana Vosloo het as verteenwoordiger van Vrouebegeleiding, Wes- en Suid-Kaap, gehelp om hierdie dag vir ons moontlik te maak.

Die byeenkoms is deur ongeveer 80 vroue bygewoon – wat ‘n vreugde!!! Die tafels was pragtig versier en daar was ligte verversings, maar die belangrikste van alles was dat ons hier was om as vroue saam aan die Here se voete te kom sit en luister wat Hy vir ons wil sê. Elkeen het geleentheid gekry om stil te word en te luister na wat God vir hul in besonder wil sê. Daar is intensief gekyk na Markus 5:21-34, die gelykenis van die vrou wat
aan bloedvloeiing gely het.

Dit is die vrouediens se begeerte dat ons as vroue sal handevat en onsself beskikbaar sal stel om uit te reik na ander, om mekaar lief te hê met die liefde waarmee Jesus ons liefhet. Jy kan jou kwellinge na Hom toe bring. Wees spesifiek, soos die vrou in die gelykenis. Vra Hom om jou te genees van jou seer en vertrou Hom, of loof Hom vir dit wat Hy reeds in jou lewe gedoen het. Ons hou in die tweede kwartaal ‘n opvolgfunksie en vertrou dat ons ons vroue se belewenisse saam kan deel en dra!!!

Groete vanuit Langebaan

Vrouebegeleiding – Swellendam

Written by Mariette Steyn on . Posted in Nuus uit gemeentes, Vrouelidmate

deur Anika Badenhorst

Met ‘n innige afhanklikheid en dankbaarheid teenoor ons Hemelse Vader is ons dames lekker besig. Februarie het ons afgeskop met “ek wil leef en liefhê Here”.

Vroue is deur God geskape met die gawes van deernis, diens en meelewing. Daar is talle geleenthede waar ons weer die lig in ander se oë kan bring.

Gedurende die jaar is truie gebrei vir die kinderhuis en dorp se kinders, babakleertjies vir die hospitaal en poppies vir die niereenheid te Tygerberg.

Junie het ons ‘n Vrouedankoffer-Sondag gehad waar fondse geïn is. Die fondse is in ons dorp uitgedeel aan die ouetehuis, Huis Adalia wat babas huisves, ACVV, Dienssentrum en Getuienisaksie. Ons het ook 100 sagte kussings aan ons kerk geskenk.

Gedurende Augustus het ons ‘n heerlike ontbyt aangebied. Die dames het die spyskaart beplan en die aankope gedoen. Die manne het die kos voorberei en bedien. Die opruim was minder lekker!

Bybelstudiegroepies vind in Blokverband plaas. Met ons November afsluiting het elke vrou ‘n stukkie gare gekry. Iets moes gemeet word! Jy moes kennis maak met ‘n maat en daarna haar polse meet. Ons hande is so belangrik. Ons vou ons hande in gebed, hou die Bybel
vas, skryf, hang wasgoed op, doen naaldwerk, plant en skoffel en dan ook die beoefening van verskillende sportsoorte. Omdat ons hande so baie gebruik word, is ons polse so dun! Verder het Annalie de Wet vir ons vertel van haar en haar man se sendingwerk van 20 jaar in Japan. Ons het heerlik gekuier en ons dank ons Hemelse Vader dat Hy hulle gelei het in die wonderlike werk.

NG Gemeente Sonstraal: Mosaic en Botterlary Straal uit

Written by Mariette Steyn on . Posted in Nuus uit gemeentes, Vrouelidmate

deur Hester du Toit

sonstraal

Bottelary-transformasie is een van die gemeente se projekte waar veral vrouens, maar ook mans ‘n verskil maak. Die visie is ‘n holistiese benadering van voed die gees, siel en liggaam.

Sonstraal het 56 broodjiemakers wat beurtelings  Sondagoggende teen 09h00 broodjies voorsien, asook selgroepe en ‘n span, onder leiding van Amanda en Cobus Louw, wat ‘n gekookte bord kos na dienste voorsien. Sonstraal se inspirasie is om te sien hoe Corinne Jansen en Sunnet Sondagoggende voor die diens vrouens se lewens verander met hul geletterheidsklasse. Elf vroue van die gemeenskap van Bottelary is ook
opgelei deur “Words for Life” (‘n geletterdheidsprogram) om “tutors” te word.

Saamspeel met meer as tagtig kinders soggens, bou brûe van vertroue en bind die Bottelary-gemeenskap as ‘n familie aan Sonstraal. Ons hele droom vir die gemeenskap is om voete te was totdat hulle self kan hardloop met die visie om vorentoe te saai. Om hierdie rede is daar vele ander betrokkenheid van vrouens wat die gemeenskap help met ‘n hele klomp lewensvaardighede vanaf identiteitsdokumente te kry tot hulp om kinders
wat in moeilike omstandighede matrikuleer, verder te help op verskeie maniere. Bottelary-gemeente raak alreeds ook betrokke en het verlede jaar vir die vroue van VGK Morningstar gaan bederf met ‘n lieflike vrouedag van dans, sing, armbande en borsspelde maak.

Liezl Dry, Briëtta Rautenbach en Elunda Basson bestuur ‘n projek waar hulle meer as 700 kersbokse, ter waarde van minstens R 150.00 elk, ingesamel het uit die gemeente en besighede om die hele gemeenskap se kinders te bederf met die enigste kersgeskenk wat meeste sal ontvang.

Hierdie aksie benodig vele meer betrokkenheid en as u graag wil betrokke raak op enige wyse, kontak Hester du Toit cascadecape@telkomsa.net.

NGK Parow

Written by Mariette Steyn on . Posted in Nuus uit gemeentes, Vrouelidmate

deur Anneke Groenewald

APRIL interaksie

APRIL interaksie

Die Vrouediens van Parow se missie is om ‘n positiewe verskil in mense se lewens te maak.

Verlede jaar het ons besluit om ‘n snoesige winterkuier op ‘n Saterdagoggend te hou. Groot was almal se verbasing om te sien hoeveel mense hierdie geleentheid bygewoon het. ‘n Dame, Sherm van ons plaaslike Buurtwag, was ons gasspreker en het ons meer kom inlig van dwelms in en om ons. Hiermee sê ek letterlik ons bure.

Dit sluit alle ouderdomsgroepe in. Hartseer om te weet hoeveel mense in hierdie strik vasgevang is. Die groot vraag is egter: Is ek en jy betrokke by ons kinders? Weet ons te alle tye waar hulle is? Ons moet weer in diepte ondersoek instel by ons ouerhuise. Ons ken nie meer gebruike soos aan ‘n tafel sit en eet nie.

Praat ons nog met ons familie en hoor of daar probleme is? Hou ons nog huisgodsdiens? Ja, ons weet die lewe is ‘n dolle gejaag, maar ons moet asseblief tyd maak vir mekaar. Ons kinders is ons toekoms en wat gaan volg as hul nie leiers kan wees nie?

Ons Jaareindfunksie was voorwaar ‘n gesellige byeenkoms waar almal heerlik kon jubel en juig oor die Christuskind se voorspelling en geboorte wat gevier word.

Die Morawiese gemeentekoor het ons voorgegaan in hierdie Adventtyd. Almal het uit volle bors gesing en dit was baie besonders. Dit was so jammer dat die tyd dié aand so vinnig verbygevlieg het.

Ons daaropvolgende openingsbyeenkoms vroeg in 2015, is ook baie goed bygewoon. By hierdie geleentheid is o.a. die nuwe komitee bekendgemaak. Ons gaskunstenaar, Ebenette van Wyk, het ons harte warm gemaak met haar pragtige stem en spontane interaksie met almal.

Ons eerste “Coffee Shop” vir 2015 is gehou op  Saterdag, 7 Februarie en het een van ons grootste bywoningsgetalle nog gelewer. Voorwaar iets om oor baie dankbaar te wees. Dit was veral goed om te sien hoeveel van die “sterker” geslag ook teenwoordig was. Hier kon ou vriende mekaar weer raakloop en lekker gesels rondom ‘n koppie tee.

Ons Vrouediens hier in Parow is werklik geseënd en  ons gaan met ‘n blye gemoed hierdie nuwe jaar se projekte en funksies aandurf met die wete dat ons Liewe Heer die pad saam met ons stap. Ons gaan werklikwaar poog om in ons optrede saam hande te vat en so ‘n verskil in ander se lewens te maak!

Durbanville-Bergsig se vrou kan woeker!!!

Written by Mariette Steyn on . Posted in Nuus uit gemeentes, Vrouelidmate

deur Alida Vorster

APRIL interaksie
APRIL interaksie

Die Durbanville Plaasfees, het op 14 Maart 2015 op die Diemersdal wynlandgoed plaasgevind. Hierdie jaarlikse instelling is vir die agste keer aangebied en die vroue van Bergsig het voorwaar weer hul ywer vir hierdie groot projek gewys deur aan almal se smaak te voldoen. Feesgangers wat met nostalgie hunker na die dae toe hul op strooibale kon sit, koeie geruik en die skape hoor blêr het, kon na hartelus as families kom ontspan – net
‘n hanetreetjie buite die stad.

Daar is lyf fynproewer gehou en by die stalletjies is lekker rondgesnuffel met tipiese kos soos afval, skaapkoppe, skaapstertjies, hoenderboudjies, waterblommetjiepotte, ribbetjies, skilpadjies, roosterkoeke, jaffels, pampoenkoekies, pannekoek, basaarpoeding, allerlei gebak soos verskeie soorte brode, beskuit, ingemaakte produkte, konfyt, souse, ens. Genoeg te ete en te drinke vir een en elk!

Feesgangers se sakke is uitgedaag met die heerlike vars plaasprodukte, plante, groente, vleis en die erfgoeduitstalling en dit het bygedra om ‘n heerlike plaasatmosfeer te skep.

Baie kindervermaak soos trekkers, plaasdiere, skaapskeer, gesigverf, trapkarre, springkastele, tombolatafel, perdjies, “Paintball”, Bomanie meerkat-vertoning, “Big Wheel”, swaaie, rondomtalie, “dizzy barrels ride” en poppekas was beskikbaar.

Ons was gelukkig met lekker musiek. Heinz Winkler asook Twee en Steyn Fourie was van die gaskunstenaars en ‘n nuwigheid, die hoender “grooming”-item, is by die plaasfees geloods. Die “Groot Pampoen-kompetisie” van Shoprite en Checkers is by die plaasfees aangebied. Dié jaar se
eerste prys is aan Pikkie Swart van Heidelberg en sy pampoen, ongeveer 478kg, toegeken.

Die fees was werklik, soos geadverteer is, plaasplesier vir die breë gemeenskap. Dit was familieen gesins-vriendelik vir oud en jonk!