‘n Hartseer dag

Written by Wilma le Roux on . Posted in Nuus, Predikante begeleiding, Taakspanne, VBO

Hulde aan Freddie Schoeman

Nelis Janse van Rensburg bring treffend hulde aan Freddie Schoeman van die Oostelike Sinode, wat gister skielik oorlede is.

“Freddie Schoeman se skielike heengaan vandag, is vir die NG Kerk ‘n reuse-verlies. Hy was ‘n toegewyde leraar, pastor, priester, begeleier van mense, wonderlike liturg, uitnemende teoloog, dosent, leier, denker, innoveerder, profeet. Met sy skerp intellek, wydbelesenheid en heelhartige verbintenis om God in sy beweging in die wêreld te volg, het hy ons gehelp met diep insigte in Godskennis en menswees.

Freddie was onder baie meer onder-voorsitter van die Oostelike Sinode se Diensraad, voorsitter van die Algemene Sinode se Taakspan Vir Missionale Transformasie, NG Kerk verteenwoordiger in die bestuur van die Seisoen van Menswaardigheid, leier in die Taakspan vir Liturgie en betrokke by die ontwikkeling van preekprogramme en liturgieë. (André Bartlett skryf: ‘Freddie het ‘n fyn aanvoeling vir liturgie en ook ‘n uitgebreide kennis van die geskiedenis van die erediens en die ontwikkeling van die kerklike jaar gehad. Hy het ‘n waardevolle bydrae gelewer as lid van die eindredaksie van die “Handleiding  vir die Erediens” en het ook gereelde liturgiese bydraes gelewer vir die eredienspublikasies “Woordwyser” en “Woord en Fees “.’)

Hy het ook in die Seisoen van Luister ‘n leidende en deurslaggewende rol gespeel. Hy het ook in talle sinodale werksaamhede leiding geneem en ‘n rol gespeel. Intussen het hy sy gemeente getrou bedien en begelei.
Sy deeglikheid en hardwerkenheid het menige hardwerkende kollegas telkens beskaam.

Maar dit was sy menswees, sterk en sag, gefokus en ruimhartig, taak- en mensgerig, wat my sal laat verlang na Freddie. Sy kalmte onder druk, lojaliteit en hulp, omgee en vriendskap het oor die afgelope jare vir my en talle ander oneindig baie beteken. Ons gaan swaar die leemte vul wat sy heengaan laat.

Ons bid vir Alma en sy kinders. Ons kan maar net raai hoe hulle voel. Mag ons almal in hierdie dae, ingeneem in die verhouding tussen Vader, Seun en Gees, ervaar hoe God ons troos en saamneem in die koms van sy koninkryk.
Ons opregte simpatie gaan ook aan sy gemeente, Lyttelton-Oos, sowel as die Oostelike Sinode.”  *

Frederick Marias, PSD vir Kerklike Opleiding by Communitas op Stellenbosch, voeg by:

“Freddie was ʼn medewerker by Communitas en het o.a. help ontwerp aan die Sertifikaatkursus en van die modules aangebied. Hy was sedert 2016 ook voorsitter van die VBO-Forum.

Ons eer sy nagedagtenis en bid vir sy vrou Alma, hul kinders en kleinkind.

 

Kix Koester Kinders – tweede kwartaal

Written by webmaster on . Posted in KIX-KOM

Ons is so opgewonde oor die eerste kwartaal!! Die Nuwe Testament ontmoetings het tot heerlike byeenkomste gelei. Ons was ook baie opgewonde om te hoor hoe verskillende skole en kerke die Kix-materiaal gebruik. Enigiemand is welkom om ‘n Kix-groep by ‘n nasorg, gemeenskapsaal of kerk te begin. Die volledige inligting oor hoe om dit te doen en hoe die materiaal werk is ook aanlyn beskikbaar.

Hierdie jaar se projek, “Kix Koester Kinders”, fokus op die ondersteuning van voorskoolse kinders plaaslik asook die werk wat in Malawi in kleuterskole gedoen word. Ons is so opgewonde oor die terugvoer wat ons reeds ontvang van Kix-groepe wat geld insamel – die Kix-kinders is vol entoesiasme om die skryfbehoefte “mini’s” bymekaar te maak!

Kontak gerus die Jeugkantoor vir enige navrae.

e-pos: jeug@sun.ac.za

telefoon: 021 808 9050

Die beloftes van God word nie geaffekteer deur mense en politici se doen en late nie …

Written by Wilma le Roux on . Posted in Prediking, VBO, Video

 Ekstra videogreep oor Sondag 6 van Lydenstyd

 

Die afgelope weke is videogrepe oor ‘n  “preek-dinkskrum” op Youtube beskikbaar gestel.  ʼn Groep het telkens saamgesels oor die fokusteks van die week – met iemand wat as ankerpersoon vrae formuleer, ‘n eksegeet wat help met die teksuitleg, en enkele persone uit verskillende agtergronde wat help saamdink. Hierdie  videos is elke Vrydag op youtube beskikbaar gestel.

Die videogrepe is wyd verwelkom, veral deur persone wat alleen in gemeentes is en nie die voorreg het om met kollegas saam te dink en gesels nie.

 

Na aanleiding van die huidige politieke situasie en die gebeure van die afgelope paar dae, het ons dit goed gedink om ʼn ekstra gesprek op te neem rondom die fokustekste van hierdie laaste Sondag (6) van die Lydenstyd.

Frederick Marais en Coenie Burger gesels oor hoe om Sondag se erediens te kon inrig om die ervarings van die afgelope week in te sluit in die erediens rondom Palmsondag.

Kyk gerus hier daarna: https://youtu.be/y9jW_IHzJko

Daar is ‘n gebed wat deur Frederick voorgelees word, geskryf deur Hannes Theron. Die gebed is hier besklikbaar as pdf asook as 3 powerpoint-skyfies. Laai dit gerus hier af:

Die sesde Sondag se eerste opname wat gefasiliteer word deur Coenie Burger en met Louis Jonker as eksegeet, is hier beskikbaar: https://youtu.be/8cCBh_8J9SE

Missionale Konferensie

Written by Wilma le Roux on . Posted in Konferensies, VBO

Hier volg die inligting van die Konferensie oor Missionale Ekklesiologie wat op Stellenbosch plaasvind gedurende Meimaand:

Embodying the Missio Dei in New Contexts: A Missional Re-imagining of the Church

 

When: 15-16 May 2017

Where: Communitas, Stellenbosch

We will focus on the following subthemes:

  • Learning from the New Testament and Early church
  • Learning from the Reformation
  • Re-imagining the church in new contexts

Keynote speaker:

We are excited to have dr Michael Moynach from the UK with us. Michael is well known for his work on ecclesiology with the Fresh Expression movement. He wrote a number of books including Church in every context.

Our local speakers and panelists include:

Prof Marius Nel, dr Pieter van der Walt, dr Lizel Joubert, dr Coenie Burger, prof Klippies Kritzinger, prof Nelus Niemandt, Pastor Costa Mitchell, Rev Leon Klate

A more detailed program will follow soon.

For more information, contact:

Wilma le Roux : wler@sun.ac.za, tel nr 021 808 3624

Frederick Marais : jfm@sun.ac.za  tel nr 021-808 9051

Coenie Burger : cwbu@sun.ac.za tel nr 021-808 2827

The Conference is a joint project of Communitas and Ekklesia and is part of our Refo500 celebrations.

 

Saamdoen-dinge vir Paasfees

Written by Wilma le Roux on . Posted in Familiebediening, Jeug en familie

Paaspakkie

Saamwees vir Paasfees

17 Saam lees, gesels en doen
aktiwiteite vir die Paasvakansie
 
Die Jeug- en Familiebediening van die Wes-Kaap Sinode bied hierdie jaar ʼn Paasfees pakkie vir families wat hulle oor die 17 dae van die April vakansie saam die hele gesin (selfs oupa en ouma) kan doen.

Hierdie pakkie fokus op die groot Lydensweek en die betekenis van Paasfees met behulp van tekste, besprekings en aktiwiteite vir elke dag.

Elke dag het ʼn kaartjie met ʼn spesifieke teks en aktiwiteitsverduideliking op, sowel as ʼn spesiale item wat in aktiwiteit gebruik kan word.

Gemeentes kan hierdie pakkie teen R50 per pakkie bestel deur die sinodale Jeugkantoor te kontak by jeug@sun.ac.za.

LW: Daar is slegs 500 pakkies beskikbaar

  • Bestellings en betalings moet teen Vrydag 17 Maart 2017 in wees.
  • Alle pakkies moet Vrydag 24 Maart by Communitas in Stellenbosch afgehaal word.
Die pakkie se drukstukke sal ook gratis elektronies beskikbaar wees op dinkjeug.ngkerk.net teen Vrydag 17 Maart vir gemeentes wat ver is en dalk die pakkies self vir hul gesinne wil saamstel.

Vir enige navrae kontak José by die sinodale Jeugkantoor: jeug@sun.ac.za.