Dink jouself Gelukkig

Written by Mariette Steyn on . Posted in Aktueel, Vrouelidmate

p1

deur Pieter van Jaarsveld

Het jy die afgelope tyd jou eerste geluksaktiwiteit nl. Dankbaarheid, beoefen? Wens ek kon by elkeen hoor hoe dit gegaan het!

Voordat ons inklim met ons volgende aktiwiteit, eers weer net vinnig die volgende: Onthou God het ons geskape om gelukkig te wees (Joh.10:10). Jammer dat so baie Christene so ongelukkig is. As jy dink dat meer as 80% van Suid-Afrikaners hulself Christene noem, dan is daar iewers fout as jy na die volgende kyk: Die nuutste Geluksindeks van die VN, waar die geluksvlak van 156 lande aangedui is, is SA 113de, twee plekke bo Zimbabwe. Hartseer dat ons sedert 2013 vanaf 96’e plek na 113 afgeskuif het. Ai, tog! En dit nog voor “loadshedding”!

Goeie nuus! As ek en jy ons gedagtes verander, verander ons emosies en kan ons reeds ‘n verskil in ons omgewing maak. Jy onthou mos nog dat jou gevoelens ander binne 2-16 minute beïnvloed tot 3 meter van jou af? Ja, selfs oor ‘n foon?

So, ek en jy, gaan ons kant bring en hier kom Aktiwiteit no. 2 (hierdie een aktiwiteit is juis belangrik omdat dit ons geluk wegvreet):

Geluk Aktiwiteit No 2: DIE VERMYDING EN AFLEER VAN OORMATIGE OORPEINSING (TOB) EN SOSIALE VERGELYKINGS

Sommige mense kan herkou en herkou aan ‘n gedagte totdat daardie ou koutjie ‘n bitter smaak het! Oormatige oorpeinsing is presies wat dit sê, naamlik om dit te oordoen, onnodiglik, die oorpeinsing van waaroms, oorsake, gevolge en jou probleme: “Waarom is ek so ongelukkig, wat gaan gebeur as ek aanhou om dinge uit te stel” of “wat gaan gebeur as ek nie hierdie werk kry nie”.

Hierdie tipe van oorpeinsing gee nie net aanleiding tot ongelukkigheid nie, maar dit dreineer jou energie, dit verminder jou motivering en verbreek jou konsentrasie.

Ek het ‘n jongman in ABSA op ‘n kursus ontmoet. Sy pa is oorlede toe hy vyf jaar oud was en sy babasussie       8 maande. Hy het my vertel hoe hy steeds omgee vir sy sussie wat toe reeds tweede jaar op universiteit was. Sy was deurmekaar met dwelms en hy het kronies daaroor getob. Sien, hy het “omgegee” vir haar, maar haar probleem was konstant in sy gedagte en hierdie “oormatige omgee” het nou ‘n bekommernis geword met al die slegte effekte op sy liggaam.

Jy onthou mos nog dat 5 minute van bekommernis (of enige negatiewe emosie) ‘n invloed op jou immuunsisteem het en jou kan siek maak?

SOSIALE VERGELYKING

Ai, dit is so menslik om die groot motor van die bure raak te sien terwyl jy in jou Nissantjie rondry! ‘n Mens kan nie help om op te let dat jou vriende, jou familie, jou spanlede, ryker, opgewekter, meer intelligent, meer aantreklik, as jy is nie. Dit is so menslik om op Facebook te kyk en ‘n ou skoolmaat te sien en ewe skielik te voel dat sy eeue jonger as jy lyk. Meer nog, sy is ‘n vennoot in ‘n groot besigheid en ry nog by dit alles ‘n spoggerige Mercedes ook! Jy kan die foto’s van hulle onlangse skivakansie in Oostenryk ook nie miskyk nie. Julle kon nie eens vanjaar Hartenbos bekostig nie! Die groen jaloesie steek nou lekker sy kop uit. Dit lei ongelukkig soms tot gevoelens van minderwaardigheid, ongelukkig-heid en mismoedigheid. Ek moet darem bysê dat dit ook ‘n mens soms kan inspireer om jou lewe te verbeter.

Hoe om sosiale vergelyking en tob af te skud.

Sosiale vergelyking: In plaas daarvan om met begerige oë na ander te kyk, kyk na jou eie lewe en of jy volgens jou eie waardes en beginsels lewe.
Vra vir jou die volgende af:
• As jy aan die einde van jou lewe kom, wat moet vir jou uitstaan van jou lewe?
• Wat wil jy graag in jou lewe verbeter en verander?
Lewe dan daardie lewe en ander mense kan weer hulle lewe leef. Later wanneer ons oor passie, doel en doelwitte praat kan jy meer aandag hieraan gee.
As dit een van die aktiwiteite is wat jy wil kies, kies een van die volgende om van tob ontslae te raak. Een wat jy weet by jou sal pas.

Tob en oorpeinsing:

Druk dit in die kiem dood:

Eerstens: Jy moet die nare gewoonte van om te tob, uit jou lewe weer. Lei jou gedagtes dadelik af wanneer jy oor dinge soos die volgende tob: “Hoekom is my rol so klein in die toneelstuk; Ek gaan nooit ‘n verhoging kry nie; Mense ignoreer my altyd.” Fokus dadelik jou aandag op iets wat vir jou lekker is, soos gaan draf vinnig (vinnige hartklop doen wondere), gaan lees ‘n lekker boek, gaan kyk na ‘n snaakse video-“clip” of gaan drink tee saam met ‘n vriendin. Doen dus iets wat jou aandag ten volle in beslag gaan neem.

Tweedens: Sê hardop vir jouself “Stop!” of “Nee!”. Later kan jy dit dan net saggies in jou gedagtes sê as jy weer besig is om te tob.

Derdens: Sit ‘n rekkie om jou arm en sodra jy weer met die “tobbery” begin, trek die rekkie en laat dit vinnig terugskiet. Nogal lekker seer manier om daarvan ontslae te raak! Sommige skryf in groot rooi letters op ‘n kaart “STOP” en dra dit orals rond. Indien hulle in die versoeking van tob verval, ruk hulle net hierdie rooi kaart uit. Dit klink amper soos sokker/rugby!

Vierdens: Sit vir jou elke dag 10 minute opsy wanneer jy jouself toelaat om te tob. Wanneer die gedagte dus in jou kop kom waaroor jy wil tob, sê vir jouself jy gaan dit gedurende die tyd doen wat jy daarvoor opsygesit het.

Vyfdens: Praat met iemand wat jy kan vertrou oor daardie dinge wat jou pla en probleme veroorsaak. Dit is ongelooflik dat as ‘n mens dit met iemand bespreek, die negatiewe emosies sommer makliker verdwyn. Daar is groot waarde daarin om dit te bespreek!

Sesde: Skryf dit wat jou pla, neer. Maak nie saak of jy dit op die rekenaar tik nie, sommer op ‘n weggooistuk- papier neerskryf, of wat ook al nie. Daardeur orden jy jou gedagtes en mag jy dan tot ander insigte kom. Meer nog, die neerskryf laat jou ontslae raak van jou negatiewe gedagtes.

Hanteer die probleem:

Kyk na die dinge waaroor jy tob en besluit hoe jy dit gaan oplos.

Kyk na die groter prentjie:

Kom ons sê jy tob oor: “My bestuurder neem meer notisie van Wilma”, of “ Ek is die enigste een wat nie na die partytjie toe genooi is nie!”, of wat ook al. Vra jouself af of dit nou werklik belangrik gaan wees oor ‘n jaar!
As dit egter iets is wat tog oor ‘n jaar wel saak sal maak, vra jou dan af wat leer jy hieruit. Hoe kan dit jou help om dit te oorkom of verbeter?
Nouja, volgende keer gesels ons verder.

Groetnis, en vind jou geluk!
Pieter

Dink jouself gelukkig

Written by Mariette Steyn on . Posted in Aktueel, Vrouelidmate

deur Pieter van Jaarsveld

Ons het in die laaste uitgawe gekyk na die mites oor wat jou gelukkig maak. Nou gaan ons vir die volgende paar uitgawes kyk na wat maak mens gelukkig. Hierdie aktiwiteite waaroor ons gaan gesels, kom nie uit populêre vrouetydskrifte nie. Nee, dit is deeglik nagevorste vaardighede en tegnieke en jy gaan verbaas wees dat die meeste van hierdie aktiwiteite reeds in die Bybel genoem word.

happy

Miskien kan jy onthou dat daar navorsing gedoen is om te vind wat maak mens gelukkig? Hierdie navorsers het vasgestel dat 50% van jou geluk geneties is. As jy ‘n befoeterde oupa gehad het, het dit ongelukkig ‘n invloed op jou; 10% van jou geluk hang van omstandighede af soos bv. jou man wat afgelê is, jou kind wat matriek gedruip het (is dit nog hoegenaamd moontlik?!), maar 40% lê in jou hande! Jy kan dus jou vlak van geluk opskuif, want dit gaan nie net jou verhoudinge verbeter nie, maar ook jou gesondheid en langer laat leef! Voordat ons verder gesels, bepaal eers jou geluksvlak
hier reg in die begin van die reeks:

GELUKSKAAL

Instruksies: Omsirkel die nommer op die skaal wat jy dink jou die beste beskryf. (Let op dat die betekenis van die nommers vir al hierdie items verskillend is)

1. Ek sien myself as:

1    2    3    4    5    6    7
Nie baie gelukkig baie gelukkig

2. As ek my met my tydgenote vergelyk, beskou ek myself as:

1    2    3    4    5    6    7
Minder gelukkig meer gelukkig

3. Sommige mense is oor die algemeen baie gelukkig. Hulle geniet die lewe ten spyte van wat gebeur. Hulle maak die beste van elke oomblik. Tot watter mate is dit beskrywend van jou?

1    2    3    4    5    6    7
Glad nie grotendeels

4. Sommige mense is oor die algemeen nie baie gelukkig nie. Alhoewel hulle nie depressief is nie, lyk hulle nooit regtig gelukkig nie. Tot watter mate
is dit beskrywend van jou?

1    2    3    4    5    6    7
Grootliks glad nie

Hoe om jou telling te bepaal:

Stap 1: TOTAAL Tel op Item 1: _____ +
Item 2: _____ +
Item 3” _____ + Item 4: _____ = _____

Stap 2: Jou gelukspunt = Totaal ÷ 4: ______
Datum: _____
Gelukspunt (na 3 weke): _____ Datum: _____
Gelukspunt (einde vd reeks): ______ Datum:_____

Jy sal sien dat die hoogste telling wat jy kan kry sewe is en die laagste een. Die gemiddeld van meeste mense is so tussen 4.5 en 5.5 en dié van studente so bietjie onder 5 terwyl meer volwassenes rondom 5.6 lê. As jy dus 5.5 kry, is jy so gelukkig soos 50% van die mense. As jy meer as 5.5 kry, is jy meer gelukkig as die gemiddelde persoon. Natuurlik is die uitdaging om hoër as 5.5 te kry en jou nuwe reis begin nou om dit moont-lik te maak! Toets jouself oor 3 weke en kyk of jy al verbeter het.

Na die reeks toets jou weer.

Ons gaan in hierdie reeks kyk na 12 aktiwiteite wat jou geluk kan verbeter. Pas sommer met elke uitgawe die een wat ons bespreek toe, maar aan die einde kan jy uit die 12, drie kies wat die beste by jou menswees pas.

GELUKSAKTIWITIEIT 1: DANKBAARHEID

Seligman, die Vader van Positiewe Sielkunde, het ‘n geluks-aktiwiteit aan ‘n aantal uiters depressiewe pasiënte geleer. Party van hulle was so erg dat hulle nie uit die bed kon opstaan nie. Hulle moes elke dag drie dinge neerskryf waaroor hulle dank-baar was. Eenvoudige goed soos: ”My seun het my vandag gebel; Ek het die boek wat my terapeut voorgeskryf het, gelees; “Ek het met bewondering na die sonsopkoms gekyk.”

Binne 15 dae het hulle van uiters ernstige depressie na ligte en matige depressie verander. Nie minder as 94% het verligting ervaar. ‘n Wonderlike bewys dat dankbaarheid geluk verhoog en selfs depressie verminder! Dis nie verniet dat die Bybel dankbaarheid beklemtoon nie! Gaan lees Fil. 4:4: “Verbly jou in die Here.” Sê jou mos dat wat die navorsing nou bewys, ‘n verskil in die lewe kan maak. Dis lankal deur die Bybel voorspel!

Dankbaarheid verskyn meer as 150 keer in die Ou en Nuwe Testament en die bevel om “dankbaarheid te toon” verskyn 33 keer. Martin Luther het
dank-baarheid as die basiese Christelike ingesteldheid beskou.

Om dankbaar te wees, is veel meer as om “dankie te sê”. Dit is om ‘n lewe van dankbaarheid te leef. Daar is gevind dat mense wat ‘n lewe van dankbaarheid lei, meer energie het, gelukkiger en meer hoopvol is, meer godsdienstig en meer vergewens-gesind, asook minder materialisties. Die gevolg is dat hulle minder depressief is, minder angstig, minder neuroties of minder alleen is. Maniere van dankbaarheid om jou geluk te laat
floreer.

1. Dink dankbaarheid! Dit is letterlik om jou alledaagse ervaringe in die lig te sien van hoe dankbaar jy is om dit te beleef. Wanneer jy jou baba aan die slaap sus, om te beleef hoe wonderlik dit is om hierdie klein prinsessie van die Koninkryk van God in jou hande te hou omdat sy aan JOU toevertrou is!

2. Dink elke dag aan drie dinge waarvoor jy dankbaar is. Waarom doen julle dit nie as gesin rondom die eettafel nie? Ander mense kry vir hulle ‘n “buddy” en dan vertel hulle elke dag vir daardie persoon waaroor hulle dankbaar is. Toe een van my kollegas deur ‘n moeilike tyd gegaan het, het hy elke dag vir my die drie dinge per epos gestuur waaroor hy daardie dag dankbaar was. Verander jou drie dinge na drie weke sodat jy nie daaraan gewoond word nie. Dink bv. oor jou gesin, na 3 weke oor jou werk, ens.

3. Dankbaarheid, selfs in die moeilikste omstandighede, help jou die stres en trauma beter hanteer, al is dit ook hoe moeilik!

4. Mense wat ‘n dankbare lewe lei, help ander ook meer. Soos jy weet, hoe meer jy gee hoe meer ontvang jy. Jou gevoel van geluk skiet die hoogte in.
Wees dus elke dag op die uitkyk hoe jy ander kan help wat nie het wat jy het nie. Dit kan soms net wees om in die gietende reën vir die koerantverkoper ‘n ou reënjas te gaan gee of vir die motorwag, wat in die verseggende hitte staan, ‘n koeldrank uit die winkel saam te bring in plaas van hom uit te jou dat hy bedel.

5. Dit is goed om dankbaarheid direk aan iemand te betuig, hetsy oor die foon, of in ‘n gesprek of per epos. Dink tog daaraan om dit soms vir jou predikant ook te sê as hy ‘n besondere boodskap, wat jou hart geroer het, gelewer het.

Volgende keer geluksaktiwiteit no 2!

Dankbaarheid is soos ‘n stringetjie krale

Written by Mariette Steyn on . Posted in Aktueel, Vrouelidmate

deur Amanda Kruger-van Deventer

il_fullxfull.421894581_ofpaSaam met buurvrou lê ek op my maag op haar bloublommetjie-sitkamermat. Ons het kleine Emily op haar magie gedraai. Haar beentjies trek sy op in die kruipposisie maar haar armpies is nog net te swak om haar op te lig. Skielik lig sy haar koppie, skuif haar armpie onder haar lyfie in en lig haarself. ‘n Wye lag staal uit haar gesiggie. Ons asem snak lagbly. Die oomblik vries in vreugdevolle dankbaarheid.
Die ou bekende spreekwoord sê: “Geniet die klein dingetjies, want jy gaan later terugdink en besef hulle was die groot dinge van die lewe.” Dankbaarheid is soos krale wat ek een vir een inryg. Hiermee maak ek vir myself ‘n dankbaarheid-stringetjie krale wat ek om my nek hang of om my pols bind as herinnering in tye wat dit moeilik gaan met my.
Sy sit langs my in die wagkamer. Haar drie kinders om haar. Al vier paar oë lag bly. Die oomblik vries in vreugdevolle dankbaarheid, want dit is die mooiste vier paar oë wat laggend my groet. Elke kind sowel as die mamma het ‘n ander kleur oë – so so mooi.
My selfoon beep. Deur “whatsup” stuur my vriendin vir my ‘n bossie blomme, vars gepluk uit haar eie tuin – vroegdag, vandag!
Die dag is lank en volgepak. My lyf is moeg. Die lakens is vars en skoon. Dankbaar vou ek die wit linne lakens oop en vly my neer tot rus.
Dit reën. Ek ry na ‘n vergadering en ek is behoedsaam vir wat op my wag. In my truspieëltjie vang my oog die reënboog in die sproei wat opspat by my agterwiele. Dit lyk kompleet of ek ‘n reënboog agter my aansleep. Ek besef ek moenie bang wees nie. God is lief vir my. Dankbaarheid kom lê die vrede in my hart.
Met die beker koffie stomend in my een hand en ‘n beskuitjie in my ander hand stap ek voordag uit op my stoep. Kosbare heilige stilte vou om my. Die dagbreek blom pienkrooi op die horison. Dankbaar verdwaal ek in hierdie oomblik.
Dis droog. Warrelwinde stofdraai dansend oor barre grond. Dan, asemsnak-bly plof ‘n groot reëndruppel in die stof. Ek ruik die vars reën. Ek ruik die dankbare veld.
Ek is alleen. Dit is donker. Skielik gaan al die ligte af. My hande soek na die kers en vuurhoutjies en ek vind dit. Dankbaar sprei die kerslig tot in elke donker hoekie.
Die ry waarin ek staan is lank. Almal wag moedeloos. Skielik borrellag iemand en die lag borrel op in my. Almal in die ry lag saam. Ons weet nie waaroor nie, maar lag is so bevrydend – skaterlag lekker.
My kind se hart is seer. My kop hang voor die opwasbak en ek huil saam met my kind stil. Skielik, dankbaar, voel ek my man se arm vol vertroostende verstaan om my skouers.
My vriendin. Ek verlang na haar. Ek wag dat sy die telefoon antwoord. ‘n Blyheid om van my te hoor straal uit haar stem en ek is so so bly.
Hy staan honger op die sypaadjie. Die drank het diep spore getrap deur sy gesig. Ek stap na hom en lê die brood in sy hande. ‘n Verbasing sprei onverwags oop oor sy gesig. “Most appreciated … most appreciated !”, sê hy en my asem snak dankbaar oor hierdie onverwagse dankbare nederigheid.
My kinders kom aangestap na my. My seun sê: “Hello Ma!” My dogter sê:
“Hello Mamma!” My hart begin bokspring soos sneeuwit lammers op die groen land.
Sy kom die winkel ingestap met haar baba op haar arm. Sy sit die kind neer op die grond. Skielik slaan sy haar hande voor haar mond in opregte verwondering en roep uit: “Kyk, kyk, hy loop! My baba loop!” Ons almal in die winkel kyk en sien hoe die seuntjie sy eerste treetjies gee en ons is dankbaar opgewonde saam met haar. ‘n Dankbaarheid sprei oop in my hart, want ek het nou net ‘n kosbare moment beleef. ‘n Seuntjie het begin loop.
“Dankbaarheid is die onthou van die hart.”
“Dankbaarheid is die moeder van alle deugde.”
“Dankbaarheid gee sin aan gister – gee vrede aan  vandag en skep ‘n droom vir môre.”
“Vrede woon in ‘n dankbare siel.”

“When you feel grateful for existence itself,
you move from doing grateful too being grateful.”
“Gratitude is the fairest blossom which springs from the soul”

Dankbaarheid en wysheid string aan mekaar. “Om die Here te dien, dit is wysheid.”(Miga 6:9) “Dit gaan goed met die mens wat by Hom skuil” (Ps.34:9) “Daarom sal ek sing tot u eer; ek sal nie stilbly nie. Here my God, vir altyd sal ek U loof!”(Ps.30, Ps.28 en Ps. 136)
“Sê gereeld dankie vir alles wat God vir julle doen, maak nie saak wat met julle gebeur nie. Dan maak julle Hom baie gelukkig.” (1 Tess. 5:18)

Mag ons dankbaarheid, deur 2015, soos ‘n stringetjie krale om ons nek hang of om ons pols dra. Aan ons klere of aan ons skoene vaswerk. Mag ons deur 2015 elke aand terugdink aan al die dankbaarheidsdinge wat my bly gemaak, vandag. Mag ons hierdie dankbaarheidsdinge soos dankbaarheidskrale versamel elke dag en inryg as ‘n bemoediging, veral, in stormtye. “Moet oor niks besorg wees nie, maar maak in alles julle begeertes, deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus.”(Fil. 4:6)
want:
“Ek die Here het julle gemaak en
Ek sal julle vashou,
julle dra en julle red,
tot in julle oudheid en grysheid
sal Ek julle dra.”
(Jesaja 46:4)

Reistog na Geluk

Written by Mariette Steyn on . Posted in Aktueel, Vrouelidmate

Stel jou voor dat jy, soos Salomo van ouds, wakker skrik en jy hoor duidelik die stem van die Hemelse Vader wat sê jy kan vra net wat jy wil en jy sal dit kry. Wat sal jy kies? Ek dink eerlik nie dat ek wysheid sou kies nie! Sit so ‘n rukkie stil en dink wat jy sou kies …!
Weet jy wat wys navorsing wat sou die meeste mense in die wêreld kies? Geluk!

Baie mense dink hulle sal gelukkig wees as hulle meer geld het, die ideale beroep beklee, die lotery wen, ‘n nuwe huis kan betrek, getroud is, noem maar op. Hierdie dinge dra by tot jou geluk, maar dit bring nie daardie diepgaande gelukkigheid waarna almal smag nie. Inteendeel, hierdie soort diepgaande geluk moet die deel van elke Christen wees. Die Bybel sê baie duidelik in Joh. 10:10 dat die God ons geskape het om ‘n lewe van oorvloed te hê en geluk is gewis deel daarvan.

In hier die reeks oor Geluk gaan ons kyk hoe en waarom ons ‘n gelukkiger lewe moet lei. In Maart sal my boek ”Dink jouself Gelukkig” op die rakke wees en ek gaan in die volgende uitgawes belangrike punte daaruit behandel.

Kom ons begin in hierdie uitgawe eers kyk na watter mites daar oor geluk bestaan:

Mite 1: GELUK MOET GESOEK WORD
Geluk is wel daar maar slegs as die regte goed met ons gebeur: die regte betrekking, die mooi huis of die ideale gesin. Ver van die waarheid! Geluk is binne ons en hoef nie gesoek te word nie. Dit is ‘n ingesteldheid (mindset) en deur ons gedagtes te verander, verander ons lewens en kan ons ‘n lewe van geluk lei. Verstaan jy nou waarom die Bybel so dikwels noem dat ons ons gedagtes moet verander? (Fil. 4:8; Rom.12:2).
Luister hierna as jy my nie glo nie!: Interessante navorsing is in 1989 gedoen oor hoe die verandering van ‘n mense se kopgeloof en gedagtes tot wonderlike veranderinge in jou lewe kan lei. Dr Ellen Langer, en ander wetenskaplikes van Harvard universiteit, het ‘n aantal mans bo die ouderdom van 70 vir tien dae na ‘n vakansieoord geneem. Hulle opdrag was om op te tree asof hulle in die jaar 1959 leef. Hulle moes dus gesels oor die werk wat hulle toe gedoen het, die president van daardie tyd, en so meer. Die musiek wat gespeel het, was die musiek van daardie tyd, tydskrifte was ook van daardie tydvak en hulle moes foto’s bring van voor 1959. Hulle was dus vir 10 dae geïndoktrineer: “Julle leef nou in die jaar 1959”. Voordat hulle die navorsing begin het, is hulle blootgestel aan ‘n klomp fisiologiese toetse soos hulle lengte, die lengte van hulle vingers, sterkte, geheue en hulle sig asook psigometriese toetse. Na die 10 dae is die metings weer gedoen. Hulle het gevind dat die mense fisies langer geword het, hulle vingers gegroei het, hulle sig het verbeter en dat hulle geheue beter was. Inteendeel, die meeste het begin optree verskeie jare jonger as wat hulle werklik was! Sommige het fisiologies en kognitief selfs 25 jaar jonger gereageer! Dit na 10 dae! Inderdaad, verander jou gedagtes en jou lewe verander! WOW!

Mite 2: EK KAN NIE GELUKKIG WEES AS MY VERHOUDING VERBROKKEL NIE
‘n Huwelik wat deur probleme gaan beteken nie dat jou lewe verby is nie en dat jou geluk nou daarmee heen is nie. Inteendeel, daar is verskillende maniere om dit te hanteer waarvan egskeiding slegs een is. ‘n Beter oplossing is om eenvoudig net weer aan jou verhouding te begin werk. Jou geluk lê per slot van sake in jou eie hande.

Mite 3: EK GAAN GELUKKIG WEES AS EK KINDERS HET
Is dit nie die versugting van so baie kinderlose huwelike nie? Ek gesels nou die dag met ‘n vriendin wat jare gesukkel het om swanger te word en uit die bloute uit sê sy: “Ek hou glad niks daarvan om ‘n ma te wees nie!”. Sy beskou die bekommernisse oor die toekoms van haar kinders, die rondjaag van een skoolaktiwiteit na ‘n ander en die teleurstellings, as ‘n sware las.
Kinders kan dikwels die grootste bron van ons vreugde wees, maar ook die oorsaak van die ongelooflikste hartseer!

Mite 4: EK KAN NIE GELUKKIG WEES AS EK NIE ‘N LEWENSMAAT HET NIE.
Dit is wel so dat getroudes meer tevrede is met hulle lewens as ongetroudes is. Navorsing wys egter dat die grootste verskil in tevredenheid egter nie tussen getroudes en ongetroudes is nie, maar wel tussen getroudes en geskeides, getroudes en mense wat hulle lewensmaat verloor het of wat van hulle vervreemd is.

Mite 5: EK GAN GELUKKIG WEES AS EK DIE REGTE WERK OF POS HET
Selfs die ideale werk se glorie is van korte duur!

Mite 6: EK KAN NIE GELUKIG WEES AS EK ‘N FINANSIëLE KRISIS HET NIE
Niemand kan dit ontken dat dit traumaties is om jou werk te verloor, bankrot te speel, jou huis te verloor of al jou spaargeld te verloor nie. Hoeveel mense moes al worstel nadat ‘n skelm makelaar of ander finansiële adviseur, weg is met al jou geld. Navorsing is egter baie duidelik dat dit ook moontlik is om self in die grootste finansiële krisis nog steeds gelukkig te wees.

Mite 7: EK KAN NIE GELUKKIG WEES NIE, WANT MY BESTE JARE IS REEDS VERBY
Hoeveel van ons, aan die ander kant van 50, het nie dikwels hierdie gedagte in die agterkant van ons koppe nie! Nonsens! Daar is in drie onlangse studies bewys dat die toppunt van die mense se positiewe emosionele ervaring lê tussen 64 en 79!
Nou toe nou! Met hierdie mites uit die weg geruim,  moet jy net so ‘n bietjie wag tot die volgende uitgawe en dan gesels ons oor WAT jy kan doen om daardie geluk in jouself te vind! Lekker!

Ons gaan lekker saamreis op hierdie reistog van Geluk en ‘n oorvloedige lewe!

Groetnis!
Dr Pieter van Jaarsveld

pieter