NG Welgelegen

Written by Mariette Steyn on . Posted in Nuus uit gemeentes, Vrouelidmate

welgelegen

Die volgende projekte is weer eens vanjaar met groot ywer aangepak.

1. Winterwarmte-projek: Pragtige truitjies, serpe, mussies en handskoene word deur gemeentelede gebrei en aan verskillende kinderhuise gestuur.

2. Herfsmark: Ons Herfsmark word jaarliks gehou. Die “Arts en Crafts”-tafel het vanjaar weer ‘n ruim bedrag ingesamel danksy ywerige vingers en goeie ondersteuning. Die inkomste word aan minderbevooregtes geskenk.

3. Ruyterwacht Seniors: Ons gemeente is sedert 2000 betrokke by seniors van Ruyterwacht. Dr Michiel Strauss, een van ons predikante, dien op die Beheerraad. Hy besoek die sentrum gereeld en bied geestelike ondersteuning aan die personeel en seniors. Inkomste verkry uit die verkoop van klere en huishoudelike items, word ook aan die Sentrum geskenk.

4.  Uitreikmark: Vanjaar se Uitreikmark was weereens ‘n groot sukses. 21 Instansies het deelgeneem. Deelnemers verkoop handgemaakte artikels, kry blootstelling en verskaf inligting aan die publiek. ‘n Restaurant word ook tydens die mark bedryf.

5. Mengelmoeskardoes is ons kerk se eie winkel.  R120 000 word per jaar ingesamel en aan behoeftiges geskenk.

6. Klein Akker is ‘n plakkerskamp waar die nood hoog is. Daar is geen elektrisiteit, lopende water of dienste nie. Ons gemeente is sedert die begin van die jaar daar betrokke. In samewerking met Hough Koen van De Bron gemeente, word klere, kos, babamelk en ander noodsaaklike items geskenk.

Elke kind sal ook vanjaar ‘n Kersgeskenk ontvang. Deur bemiddeling van ‘n gemeentelid is ‘n skeepshouer aan Klein Akker geskenk. Dienste word Sondae daar gehou. Die inwoners se harte is oop vir die Verlossingsboodskap en groot seën word ondervind.

Ons dank ons Hemelse Vader vir ons gemeentelede se entoesiasme en talente. Die ywer waarmee almal saamwerk, strek Hom tot eer.

Bonnievale

Written by Mariette Steyn on . Posted in Nuus uit gemeentes, Vrouelidmate

deur Hilde Liebenberg

Ons het twee dames van die Alzheimers vereniging in Pretoria genooi om vir ons meer oor die toestand te kom vertel, asook die hantering van sulke pasiënte. Een van die positiewe uitkomste is om vir hulle iets te gee om hulle besig te hou, vandaar die Alzheimer voorskoot, of te wel die vroetelvoorskoot. Ons vroue het besluit om vroetelvoorskote te maak vir ons Alzheimer-pasiënte in ons plaaslike Ouetehuis, en vandaar die projek. Die voorskote moet aan ‘n paar vereistes voldoen – dit moet baie kreatief wees, baie kleurvol, verskillende teksture, aktiwiteite soos knope en knoopsgate, ritssluiters, velcro, veters ens, asook ’n sagte speelding en plek vir n foto’tjie in ’n plastieksakkie van die pasient se kinders of familie – en enige ander kreatiewe idees! Al ons kreatiewe naaldwerksters het ingespring en begin om die mooiste voorskote te maak. Met ons afsluitingsvergadering het ons die voorreg gehad om 16 vroetelvoorskote aan Herfsvreugde te oorhandig. Dit hou pasiënte baie ure lank stimulerend besig en maak hulle rustig.

bonnievale

Volwasse geletterheid in Durbanville Moedergemeente

Written by Mariette Steyn on . Posted in Nuus uit gemeentes

DvilleGemeentedeur Rhoda van Schalkwyk

As jy geletterd is, kan jy lees en skryf. Wanneer jou lewe taaleise aan jou stel, kan jy aanhou funksioneer. Jy kan ‘n padteken lees, jy kan ‘n dagboek hou, Jy kan ontspan met ‘n glanstydskrif, jy kan ‘n nota op die yskas plak, jy kan ‘n brief op jou kind se kussing laat, jy kan volg as die dominee Sondag uit die Bybel lees. Natuurlik ja, want jy kan lees en skryf.

As jy ongeletterd is, kan jy nie lees of skryf nie. Miskien ‘n klein bietjie, maar dis so moeilik dat jy skaam is. Jy sukkel as jy jou naam by die kliniek moet spel. Jy raak onwillekeurig aan die hakkel en huil. Jy sê jy het nie nou tyd nie of jou bril is weg. Jy’s moeg … ag lees gou vir Mamma die brief van juffrou. Hoe gaan jy als onthou? Hoe gaan jy daai lekker resep gebak kry? Hoekom het die lewe jou oorgeslaan? As daar maar net geld was destyds, dat jy nie vir die jonger kinders moes help skoolgeld verdien het nie. Al wat jy kan onthou, is dat jy al jou hele lewe lank werk, van jou eie kinderjare af, elke dag.

En nou, noudat jy al ‘n ouma is, is daar mense wat vir jou tyd het. Hulle wil met jou deel sodat jy ook sal kan lees en later ook skryf. Binne enkele weke kan jy jou eie naam spel, jy kan jou kinders se name skryf, jy kan selfs Jesus se naam skryf. Jy kan ‘n kaartjie skryf as jou vriendin verjaar. Jy kan ‘n kinderboekie vir jou kleinkind lees. En die mense wat jou ken, wil weet wat jy leer. Hoekom doen jy nou soveel moeite? Jy sê vir hulle jy het ‘n interessante lewe gehad en jy wil eendag ‘n boek daaroor skryf .

As die lewe, die politiek en die armoede veroorsaak het dat ‘n mens nie tot funksionele geletterdheid kon vorder nie, dan is daardie mens die ware agtergeblewene van ons samelewing. Selfrespek word herbou langs die geduldige pad van geletterdheid. Deur verhoudings en met liefde word herstel gefasiliteer. Herstel wat selfs die leemtes en swaarkry van lank gelede kan omsit in ‘n wil om te leer. Herstel wat ‘n skoollose jeug kan omsit in leergierige wysheid wat kleinkinders inspireer om enduit skool toe te gaan.

Daar is ‘n droom wat besig is om ‘n plan te word hier in Durbanville. Ons wil ‘n virtuele sentrum vestig sodat ons volwassenes kan help om geletterd te raak en dan verder te leer. Ons wil die oorsaak en gevolg van armoede knak met die koevoet van geletterdheid.

Vir my het betrokkenheid by volwasse geletterdheid my ‘n ander bril laat opsit: my frustrasie rondom maatskaplike verval is omgesit in konstruktiewe betrokkenheid. Hier is ‘n manier om ‘n hand na iemand uit te reik op so ‘n wyse dat die persoon daadwerklik langtermyn hoop vind. Dit is meer as polities-korrekte gebare. Dit skep betekenis vir diegene wat gee en vir diegene wat ontvang. Dis nie visse uitdeel nie, dis visstokke maak. Dis die nederige besef dat al my leergeleenthede die antwoord bied op iemand anders se jarelange gebede om tog ‘n kans te kry. Dit is om die hande, die voete, die hart van Jesus te wees sonder om te preek … deur eenvoudig vir iemand die alfabet te leer.

Tafelberg gemeente – Aan die voet en hange van Tafelberg

Written by Mariette Steyn on . Posted in Nuus uit gemeentes

tafelberg1deur Beulah Saayman

Dit is waar Tafelberg Gemeente op ‘n pragtige Satermiddag saamgekuier het. Die Hoerskool Jan van Riebeeck se rugbyveld was hierdie onge-looflike mooi kuierplek. Met braaivleisvure wat knetter in die agtergrond, was almal se monde en harte vol t.o.v. die pragtige uitsig oor die berg, die middestad en Tafelbaai. Hoe wonderlik is dit nie om so na aan een van die sewe wonders van die wêreld te woon en werk nie? Telkemale wanneer ek na die berg kyk, herinner ek myself daaraan dat die Here ons Rots is. So seker as wat Tafelberg ‘n baken in die Wes-Kaap, in SA en in die wêreld is, so seker is Jesus Christus ‘n werklikheid in hierdie wêreld. Hy hou ons vas en sy naam sal tot in ewigheid standhou. Die Here het self gesê dat Hy sy kerk op die Ewige Rots sal bou. Ons gebed is dat gemeentes van oraloor, op hierdie Rots, sal bou. Van die berg af is die uitsig op die toekoms net soveel mooier.

Aan die voet en hange van Tafelberg vergader die Here sy kerk. Saam bou ons aan Sionsberg, want in sy Woord word ons sterk.

Aan Hom al die eer Hy hou ons bymekaar. Telkemale en keer op keer word ons rondom sy Woord vergaar.

tafelber4  tafelber 2 tafelberg3

Bergsig gemeente – ‘n Kuier ten bate van Donald Pitt

Written by Mariette Steyn on . Posted in Nuus uit gemeentes

bergsig1Mathys Roets en Annalise Wiid het met hul optrede die gaste die Woensdagaand geïnspireer en ‘n vlammetjie van hoop aangesteek vir Donald.

Die fondsinsamelingsprojek, om ‘n aangepaste voertuig te koop teen R300 000.00, is amptelik afgeskop. Donald sal dan gemaklik by sy werk kan uitkom.
‘n Hoogtepunt was toe die Hallelujalied gesing is deur Mathys en Annalise en hulle die gaste genooi het om saam te sing.

Mathys, Lize en Donald het rolstoel-stories uitgeruil en geskaterlag oor al hul daaglikse ervarings.
Met ‘n prystrekking is daar reeds R5 360 ingesamel. ‘n Buitelug verwarmer is deur Gail Agenbag geskenk.
Hans Human is die projekleier van die Betesda-projek wat die inisiatief geloods het.

Radio Tygerberg-omroeper en skrywer, Benescke Jansen van Rensburg, het met die Bergsigvroue gesels oor die tema: “Kry jou geestelike sprankel terug” en sy het ook haar nuwe bybelstudieboek; “Oorkom jou vrees” bekend gestel. As spreker het sy het ‘n treffende boodskap gebring wat inspireer. Lizel Mouton het ʼn paar liedjies van haar nuwe Gospel CD, “LIG”, gesing. Die lied se woorde het mooi aangesluit by die “sprankel”-tema. Marina Olivier het items wat sy van Thailand af gebring het, uitgestal en te koop aangebied ten bate van hulle Thailand gebedsuitreik, Frontida. Die vrouens het by mooi gedekte tafels gesit en op die spyskaart was potbrood, paté, port & poeding. Die poedingtafel het die vroue so opgewonde soos kinders by ‘n kinderpartyjie gehad. Die vrouens kon nie wag om hul “poedingsakkies” vol lekkergoed te prop nie! Lux Verbi het van Benescke se boeke weggegee as geskenke.

bergsig2

Voete, vrede, vonkel, vlerk – deur Madelieine Russouw

Written by Mariette Steyn on . Posted in Nuus uit gemeentes

onrusVroueretraite2013

Ons het Vrydagaand weereens besef dat ons fokus op God moet wees en nie eerste op onsself nie. (Karin se tema: It’s not about you, it’s about God.) Ons het ons kersies weer by God se lig aangesteek om so weer lig in ons eie lewens uit te straal.

Soggens vroeg het die dames kans gehad om in die pragtige natuur te gaan stap, met stiltetydstukkies deur Madeleine, waar hulle gelei is om hul “lewensklippe” vir God te gee. Om God toe te laat om ONS voete te wees en ONS te dra.

Na ‘n heerlike ontbyt en samesang het Chookie vir ons ‘n verrykende aanbieding met dié tema gegee: Vind jou outoriteit, jou identiteit, in God. Laat die paddas in jou tuinslang uitgespoel word deur God, sodat jy nie net bloot BEKEER en dan PARKEER nie, maar dat jy vir God met vonkel kan lewe!
Na lekker tee en koekies (mmmm!) het ons vrede gevind deur gebed saam met Mattie Heys. Sy het ons so mooi gelei om te verstaan waaroor gebed werklik gaan. Dat dit nie bloot net ‘n lysie van dank en behoeftes is nie, maar ‘n ware verhouding met God, ons Vader.

Die Saterdagmiddag het ons ‘n ware retraite (stilword) gehad. Almal kon gaan stap, slaap of net rustig wees met ‘n begeleidende stukkie om hulle voor te berei vir die aand se Vroue met Vlerke-aanbieding.

Ons het Saterdagaand kans gekry om onder leiding van Madeleine Russouw stil te raak. Met elke vrou wat ‘n geskeurde “vlerkie” (repie geskeurde lappie) ontvang het en kans gekry het om hul eie stukkende vlerke raak te sien.en hul gebrokenheid wat hulle verhoed om te vlieg, te sien. Saam met Sarai, Abram se vrou, het ons ontdek dat elkeen unieke omstandighede het, dat ons almal soms moet maskers dra, MAAR dat God altyd ingryp, ons vlerke heel maak en elke vrou die krag en genade gee om nog hoër en sterker vir God te vlieg.

Die kamp is afgesluit met Godstories – sommiges hartseer, maar sommiges dankbaar vir God se teenwoordigheid in ons lewe. Ons dank God vir ‘n wonderlike, geseënde naweek.

Herbertsdale gemeente deur Annetjie du Toit

Written by Mariette Steyn on . Posted in Nuus uit gemeentes

herbertsdaleAlgemene vergadering
Tydens ons laaste vergadering het ons met groot welslae Eva se gebed tydens die opening  behandel. Heelwat vroue het na die vergadering die gebed aangevra om dit aan ‘n  ander vriendin te gaan gee.

Bybelstudiegroep
Ons Bybelstudiegroep het in April ons studie oor Spreuke voltooi en dadelik besluit om die opwindende geloofsreis saam met God aan te pak – soos ons dit vind in die brosjure wat deur die Vrouebegeleidingtaakspan van Wes- en Suid-Kaap voorgestel word. Ons het besluit om almal saam (al agt van ons) die reis aan te pak. Dit was van die begin af duidelik dat hierdie ‘n unieke reis is wat ‘n groeiende hongerte en dors in elkeen van ons geskep het om saam te soek na die volle impak en betekenis van elke vers in die gedeelte wat ons biddende in verskillende vertalings lees. Ons het geleer dat ons God se stem herken in sy nabyheid, sy Woord en in mekaar se woorde.

Hy het ons geleer dat Hy met elkeen van  ons  ‘n  eie unieke geloofsreis aanpak met die gevolg dat elke lid se bydrae waardevol is en betekenis dra. Daarom luister ons waarlik na mekaar se woorde en is elkeen se insig op hierdie geloofsreis belangrik op hierdie geloofsreis.

Ons het vier weke geneem om die eerste gedeelte oor Maria en vyf weke om die tweede gedeelte oor Elisabet te voltooi. Ons reis saam met Christus, deur in sy Woord te wandel, is rustig, vol vreugde, Skrifvaslegging, nuwe geestelike groei en ‘n duidelike visie as gestuurdes na ons naaste, die behoeftiges in ons omgewing en ongeredde mense. God bemagtig ons  met sy Woord en nabyheid by elke stasie (weeklikse Bybelstudie) sodat ons met nuwe krag en geesdrif toegerus en lus voel om die wêreld in die oë te kyk en saam met Hom in sy liefde en krag ‘n verskil te maak.