Posts Tagged ‘gemeentenuus’

Oggend-tee op Herbertsdale

Written by Mariette Steyn on . Posted in Argief Vrouelidmate

herbertsdale-okt14

deur Kinnie Britz

Ons hier op Herbertsdale het ‘n wonderlike oggend-tee gehad en ek deel dit graag. Die saal was baie mooi versier. Allerhande verskillende houers is   gebruik – grotes, kleintjies, krommes, skewes, met ore en sonder ore – baie mooi! Die blomme het gevarieer van Clivias, Varkore en Septemberbos, tot stukke tak!

Ons het die oggend begin met Eva se gebed in ‘n verwerkte vorm, om by die gehoor van mans, ouma-grootjies, oumas, ouers en kinders te pas. Die spreker was die pragtige Michele Weyers, ‘n voormalige lugwaardin, maar ook die eerste Messiaanse predikant in Suid-Afrika. Die onderwerp was: “Klein vuurhoutjie, groot vuur – hartseer is in sy visier!”. Ons het geskaterlag vir die komiese aanbieding, maar was tog diep geraak deur hoe maklik ‘n mens in die strik trap van onbedagsame woorde en die oordra van hoor-sê.
“Reën” van Adam Tas, is vervolgens gesing deur een van ons eie lede, Belinda Claassen. Die woorde van hierdie lied is besonders en was op die tafels beskikbaar.

herbertsdale-okt14-2Daarna is ons vermaak deur Sterland Drama Studio van Mosselbaai. Vyftien kinders het opgetree en dit was ‘n belewenis. Hierdie kinders presteer geweldig goed en van hulle het reeds al in New York medaljes verwerf. En wat dit vir ons baie besonders maak, is dat die afrigter een van ons eie mense is nl. Miné (Otto) van Schalkwyk. Tussen die deelnemers was dan ook ‘n hele paar van ons eie Herbertsdale-kinders.

Natuurlik het die koektafels behoorlik gekreun!

Ons was na liggaam en siel gevoed en opgebou – wat ‘n wonderlike oggend!

Groete hier van ons af en mag die vrouens van krag tot krag gaan!

Bybelstudie les dors op Swellendam

Written by Mariette Steyn on . Posted in Argief Vrouelidmate

swellendamdeur Carin Brink

Op Dinsdagaande verruil sowat vier-en-twintig Swellendammers hul kosbare 7de Laan vir stilword om die Bybel. Hulle is nie meer vandag se kinders nie – die bene raak stadiger as die breinvermoë, en die gemoed moet beskerm word teen die bombardering van slegte nuus en negatiewe gedagtes wat met onnodige kommer hul goue jare kan vertroebel.

Soos ‘n groot familie sit hulle om saamgepakte tafels, soos Jesus en sy dissipels by die Avondmaal. In hierdie tyd word skatte met insig ontdek en vrae wat pla, bespreek.

Hulle mag dalk soms as “oumense” beskou word wat niks te doen het nie, maar by hierdie byeenkomste kom drink hulle saam van die lewende, verfrissende water wat Hy uit sy Woord laat vloei.

Of hul nou sestig of neëntig is, hierdie afspraak mis niemand nie!

Kontak Andries Truter by 028 514 1818 of apiegee@telkomsa.net

Piketberg

Written by Mariette Steyn on . Posted in Argief Vrouelidmate

piketsdeur Marina Grobbelaar

Die Ring van Piketberg, bestaande uit agt gemeentes nl. Aurora, Eendekuil, Hopefield, Koringberg, Moorreesburg, Piketberg, Porterville en Redelinghuys het op 17 September 2013 ons jaarlikse Ringsbyeenkoms gehou.  Ons roteer dié byeenkoms tussen die verskillende gemeentes en dit was vanjaar Koringberg se beurt. Die ongeveer 150 vroue het natuurlik gesels en ou vriende gegroet soos net 150 vroue kán doen!!

Die vroue kon vanjaar stalletjies teen R20 “koop” en alle verkope was dan vir hul eie sak. Daar was produkte te kies en te keur. Bybelmedia het ook ‘n stalletjie gehad en daar kon op LIG-tydskrif ingeteken word teen ‘n baie spesiale prys.

Ons was baie bevoorreg om Adri-Louise van Reenen as spreker te hê. Op haar kenmerkende innemende manier het sy ons aangemoedig om met meer waardering op te tree teenoor elkeen wat ons pad kruis – van die vragmotorbestuurder wat lang tye van sy huis af is tot die vullisverwyderaar.

Tee en koffie, lekker beskuit en koekies en ‘n heerlike ligte ete het bygedra tot ‘n baie genoeglike oggend.

Pofadder

Written by Mariette Steyn on . Posted in Argief Vrouelidmate

pofadder1

deur Alida van Niekerk

Vanaand moes ek vinnig kamer toe vlug of ek het in trane uitgebars. Dis hartverskeurend om jou hartsmense so te sien. Pa se wens is so eenvoudig, maar ook nie. Hy wil nog net een keer die Boesmanland groen sien. My liewe dierbare man se gemoed is donker en sy moed min. Hy sit en raak oud voor my oë. Ag Here asb ek kom pleit tot u vir reën vir ons Boesmanland, want ek weet soos my manne lyk, lyk baie ander boere ook so. Hoe troos ek hulle, hoe bemoedig ek hulle?

Wat meer kan ek doen. Ek los elke oggend my pragtige witkopseuntjie slapend by die huis om te gaan werk, ek kom saans watter tyd eers weer by die huis en dis dan amper weer sy slaaptyd. Ek mis my manne so vreeslik baie, maar daar is nie ander plan te maak nie. Ons moet lewe en die diere moet voer kry. Here ek weet u sal reën stuur op u tyd – ek glo dit met my hele hart en wese, maar Here bring daai wete na die boere, gee hulle krag en vertroos hulle en as dit u wil is, laat pa asb sommer nog baie groenveld en nat vleie hier in die Boesmanland sien. Ek dink ma het dalk verkeerd gesê toe sy gesê het jy huil net twee keer in die Boesmanland, die slag as jy hier kom en dan weer as jy weggaan. My seerste seer is die droogte, my hart en siel huil vir ons wêreld, dier en sy boere …

pofadder2

Aurora (Sandveld)

Written by Mariette Steyn on . Posted in Argief Vrouelidmate

aurora

deur Suzette Jacobs & Jane van Zyl

“Almagtige Vader, Skepper en Bron van alle goedheid, as ek vir U wil dankie sê, soek ek stamelend na woorde. Wie U is en wat U doen en hoe U gee, oortref taal. U oorweldig my; laat my sprakeloos …”(Uit: Gebede wat raak van Annalise Wiid: ‘n CLF-pamflet)

Die Getuienisgroep het gesorg vir pragtig-vrolik versierde tafels en spyseniering by ons afsluitingsvergadering. Kersfees 2013!

Wie sal nou sommer ‘n Poskantoor  en die NG Kerk bymekaar uitbring. Dis presies hierdie storie (geskiedenis) wat Beatrix Kotze vir ons vertel het.

Teen ongeveer 1925 is die behoefte aan ‘n poskantoor vir die klein dorpie in die Sandveld deur die Vrouesendingbond en die CJV raakgesien en  gesamentlik het die gebou teen ‘n koste van £265 (!) tot stand gekom en lewer die NG Kerk en die posagentskap tot vandag toe ‘n noodsaaklike diens aan die hele gemeenskap van Aurora!

Dienslewering op vele gebiede is nog steeds die wagwoord vir die Vrouebediening hier.

So word in tye van werkskaarste gesorg vir kos op die tafels van baie mense.  Vir een maand elke jaar is Aurora-gemeente verantwoordelik vir die ringsbydrae tot Huis van Heerden – ‘n kinderhuis (ons het die hele maand se vleisvoorraad geskenk); waar skoolklere ens kortkom, help die vroue met skenkings aan sendingwerkers in Papua-Nieu-Genuië, Zambië en nog vele meer.

Alles kan die vroue bybring, danksy ywerige vroue (ondersteun deur die manne), basaars, verkopings, skenkings, donasies, ens.

Ons fondse word getrou deur baie jare met sorg hanteer deur ons tesouriere, Beatie Kotze.

Leierouderling Bessie Brand is ook ons verteen-woordiger op die Kerkraad.

Ons sameroepster is Suzette Jacobs – eggenote van ons leraar. Leidsters in wyke gee verder struktuur aan ons bediening. Vroue van die gemeente wend hulle gawes aan in diens van die gemeente, gemeenskap en, bo alles in diens van die Koninkryk!

Daarom die dankgebed in ons harte: Aan God die Eer!