Posts Tagged ‘Wereldbiddag vir vroue’

Vrouediens NGK KUILSRIVIER (Moedergemeente)

Written by Mariette Steyn on . Posted in Argief Vrouelidmate

kuilsrivier-okt-1

Kuilsriviertafel-okt14deur Wilna Kruger

Ja, die “ou moeder” waak steeds oor haar kinders – van die jonges by Alta du Toit-skool tot die seniors by Huis De Kuilen;  en sommer nog die klompie tussen-in ook.
By Alta du Toit-skool is baie behoeftes.  Met bydraes uit die gemeente kon ons vanjaar die lakens en handdoeke wat verlede jaar vir die koshuis aangekoop is, aanvul met “fleeze” kombersies en nog handdoeke om die lyfies droog en warm te kry.  Broodnodige toiletware is ook voorsien.

Die Wêreldbiddag vir Vroue is, soos vorige jare, saam met Huis De Kuilen se dames gehou – natuurlik eers na ‘n lekker koppie tee en eetgoedjies. Op 2 Oktober het ons óók ‘n lekker bederfie vir die inwoners van die tehuis en al die seniors van die omgewing gehad toe hulle rondom teetafels kon kom luister hoe Belia Lourens van Tsotsi-faam gewilde liedere van vroeër dae sing.

Kyk, ‘n groot lekkerte in ons gemeente (sommer vir die families en vriende ook) is ons jaarlikse busuitstappie en oee!! … daardie sop-en-broodjie-aand in die winter!  Hier word groot gekuier. Dís nou geleenthede wat jou bly maak dat jy ‘n mens is!

Ons damesoggend neem verskillende vorme aan.  Hierdie jaar het ons ‘n handwerkoggend gehad en glo my, al begin jou oggend met ietwat van ‘n kramp in die kakebeen, jy gaan daar weg met ‘n lied in jou lag!

kuilsrivier-okt-2Die jaar snel vinnig na sy einde toe en ons voel geseënd as ons terugkyk na die projekte wat ons met die steun van ons gemeente aangepak en deurgevoer het. Maar ons het nog lank nie halt geroep nie.  Die matriekdiens en ons jaareindfunksie lê nog voor, maar dít bly vir eers ‘n verrassing.

Ons seënwense aan al die Evas.  Wees die Vrou met Vlerke soos God jou gemaak het!

Groete van vrou tot vrou

Ons bid vir die vroue van Egipte BONNIEVALE

Written by Mariette Steyn on . Posted in Argief Vrouelidmate

deur Hilde Liebenberg

SAMEBINDEND. Die HAT beskryf die woord as byeen en ineen. Dit is presies wat gebed beteken. Dit is asof die Nyl deur ‘n wêreldwye dorre woestyn vloei wanneer vroue saam bid.

bonnievale-apr14

‘n Bybelstudiegroepie in die Van der Merwe-gemeente in Bonnievale het hierdie jaar die vrouebiddag in ons midde gereël. Die reëlings is vooraf met deernis en liefde vir die vroue van Egipte, gepaard gegaan, maar was veral SAMEBINDEND vir hierdie groepie. Een lid het skool toe gegaan en daar uit ‘n stoor vir elkeen van die groepie met Egiptiese drag voorsien. Die dekor in die kerkwas ‘n pragtige uitgebeelding ooreen-stemmend met die tema: Strome van lewende water. ‘n Put is gebou (darem net van buitebande en Hessian met ‘n emmertjie wat bokant die put gehang het). Jesus het die Samaritaanse vrou ontmoet toe Hy daar gaan rus het. Twee vroue het hierdie toneeltjie aangrypend uitgebeeld. Hierdie vrou het tog begryp sy het nie met ‘n gewone mens te doen gehad toe Hy vir haar lewende water wou gee wat haar nooit weer sou laat dors word nie. Dit was ook die hooftema van die boodskap. Jesus het geweet sy het reeds vyf mans gehad “en die een wat sy nou het, is ook nie haar man nie”. Hy was nie veroordelend nie, maar het met volle deernis met haar gepraat. Dit het ‘n mens laat wonder: wie kan ooit ‘n eerste klip gooi?

Die humor is mos altyd daar. Die lid van die groepie wat graag spontaan baie gesels, was soos ‘n mummie aangetrek en sy moes doodstil in die voorportaal staan. Mummies kan hoegenaamd nie praat nie. Sy het egter met liefde hierdie groot opoffering gemaak.

Daar in die voorportaal is van die vrugte uitgestal wat die Egiptenare langs die Nyl kweek: granate, druiwe en groot, pers adamsvye. Een verslawende vyeliefhebber het gewonder of dit groter sonde sou wees om twee vye in die kerk te steel as van ‘n boom af. Haar vriendin met die sagte hart, het haar van die versoeking gered en vir haar twee vye gesteel!

Slegs 12% van die vroue van Egipte is Christene.

Bellville-Uitsig

Written by Mariette Steyn on . Posted in Argief Vrouelidmate

deur Esther Blackaller

bellvilleuitsig-apr14By Bellville Uitsig-gemeente het ons ook saam met vroue wêreldwyd en veral Egipte, die gasheerland wat die Wêreldbiddagprogram saamgestel het, die tema: “Strome water in die woestyn” bedink en gebid. Die Christendom het na Egipte gekom deur die Egiptenare wat in Jerusalem was en die Evangelie in hulle eie taal gehoor het tydens die uitstorting van die Heilige Gees op Pinksterdag. In die Ou Testament was Egipte ʼn toevlugsoord teen die droogte en hongersnood vir Jakob en sy gesin tydens Josef se administrasie. In die Nuwe Testament is dit ʼn toevlugsoord vir Jesus en sy ouers tydens Herodes se kindermoord.

Vandag is Egipte, tsv hul eie onrus steeds volgens die VN se vlugtelingagentskap ʼn plek waar vlugtelinge ontvang word. Steeds ʼn toevlugsoord teen oorlog en geweld vir Soedanese, Somaliërs en vele ander.  Die situasie van die vlugtelinge is baie krities aangesien hulle soms geen maatskaplike beskerming geniet nie. Vanuit die geskiedenis van Egipte in die Bybel dink ons ná oor Christene se rol as ʼn “stroom in die woestyn” vir die bevolking wat werklik “droogte ondervind.”

Garies

Written by Mariette Steyn on . Posted in Argief Vrouelidmate

deur Raffealle Basson

Die gemeente GARIES is anders! Dieselfde vroue soos in Egipte, maar met ‘n verskil. In die stede nooi dames mekaar vir die geleentheid, maar hier is die geleentheid sinoniem met worsbroodjies. Ja, klink vreemd het ek ook aanvanklik gedink. Die opnames  van getalle word alreeds twee weke vooraf gemaak en die wors word die oggend vars gebraai. Vroue lewer al van vroeg bestellings af. ‘n Mooi bedrag van R2 300 verhoog die bydrae vanaf die gemeente. Die WBVV  word  altyd om 12h30  gehou en word ook deur die plaaslike hoërskooldogters bygewoon. Die inkleur van die geleentheid was vir my aangenaam, omdat ek ook die “power point”-aanbieding ontvang het. So ‘n paar jaar gelede was ek in Israel en  Egipte – dit was voorwaar ‘n voorreg om die dames te kon saamneem op ‘n toer daardeur. Ons kon leer van papirus en die cardouche en die heilige besie – scarab.

Die tema, Strome in die woestyn, was absoluut van pas, aangesien hierdie streek so ‘n maand gelede ook oorstroom is deur ‘n geweldige reënstorm. Wat  my soveel beïndruk het, is die Samaritaanse vrou wat so hartlik en respekvol deur Jesus by die put ontvang is. Dis juis op dié eenvoudige en gewone plekke waar Jesus die mens altyd inwag. Hy is daar voor ons nog dit besef. Die vloei van water is so ongelooflik en sonder perke. So wil Hy ook vloei in my hart, siel en verstand.

Dankie Egipte.
Dankie Here!

Paarl

Written by Mariette Steyn on . Posted in Argief Vrouelidmate

deur Elmien Thorn

In die Paarl het ons twee geleenthede aangebied. Vrydagmiddag se byeenkoms is om 13:00 in die Toringkerk gehou en word bygewoon deur vroue wat in die middedorp van die Paarl woon en/of werk. Op die foto is Jeanne saam met enkele biduurgangers. In die agtergrond wapper die vlag van Egipte wie se dames verantwoordelik was vir die tema vanjaar.

paarl-apr14

Hier was dit weer so betekenisvol omdat Jeanne in die Toringkerk grootgeword het! Sy is hier gedoop en getroud. Haar oupa was ‘n ouderling op die eerste (stigters-) kerkraad van die gemeente.

Jeanne het, op haar besondere en innemende manier, vol humor én diepte, haar geselsie oor die mooi tema van 2014, “Strome water in die woestyn”  by die twee verskillende groepe aangepas sodat albei byeenkomste werklik geseënd was.

Ek het die besondere voorreg om predikantsvrou en orrelis van Toringkerk en Bybel- en musiekjuffrou by La Rochelle te wees. So ek reël die twee byeenkomste jaarliks.
Vrydagoggend by die Hoër Meisieskool La Rochelle in die Paarl, was 500 dogters bymekaar. Die spreker was Jeanne Cillié (regs), en dit was vir ons baie spesiaal, omdat Jeanne oud-Larrie en oud-Larrie juffrou is! Die meisies het haar baie geniet.

NG Kerk De Eike, Kuilsrivier

Written by Mariette Steyn on . Posted in Argief Vrouelidmate

deur Marina Rogotta

kuilsrivier-apr14Ds Janine Williams van die VGK Sarepta-gemeente het ons kom toespreek oor ons “woestynlewe”.  Sy het dit so pragtig verduidelik d.m.v. die storie van die Samaritaanse vrou, dat God ons lewende water gee al is ons in ‘n “woestyn” in ons lewe! Ons Here, sonder grense, reik uit na almal. Deur God se smeltkroes word ons gesuiwer om al meer na sy beeld gelyk te word. Deur woestynervarings maak Hy ons mooi en deur moeilike tye maak Hy dit wonderlik. Op ons mees verlate tye, was Hy daar vir ons! Almal van ons bereik so ons eindbestemming – beplan deur ons Hemelse Vader!

Durbanville

Written by Mariette Steyn on . Posted in Argief Vrouelidmate

deur Cindy vd Merwe

dville2-apr14

dville1-apr14Die Wêreldbiddag vir Vroue het in 1887 begin toe vroue van die Presbiteriaanse Kerk in die Verenigde State van Amerika aangegryp was deur die nood van immigrante en die nagevolge van die vrystelling van slawe in hulle land. Hulle het ‘n oproep gedoen vir ‘n nasionale dag van gebed. Vroue van ander kerke het ook begin deelneem en die beweging het vinnig na ander lande versprei. Waar vroue ookal kennis gemaak het met die biddag, het dit hulle geïnspireer om in hul eie lande ook daarmee te begin. Die gevolg was dat die dag gou bekend gestaan het as die WÊRELD-BIDDAG VIR VROUE.

Durbanville Gemeente het die voorreg gehad om hierdie jaar die gasvrou te wees van die 84ste Wêreldbiddag vir Vroue.  Alle vroue – oud en jonk – was deel van hierdie gebedsgolf wat jaarliks oor ons land spoel.

Die tema vir 2014 was: “Strome water in die woestyn” en die land waarop gefokus is, was Egipte.
Dr Almatine Leene van NG Kerk Stellenbosch-Wes  was die spreker.