Author Archive

Ontwikkel vriendskappe oor grense

Written by Wilma le Roux on . Posted in Ekklesia, Kursusse, VBO, Vennote

Loop Saam –

Walking Together:

Eendag-werkswinkel

Hierdie dag word ʼn spasie geskep vir alle predikante én lidmate wat graag ʼn rol in versoening wil speel.

  • Waar ons oor grense na mekaar uitreik en vir mekaar omgee, leer ons om mekaar met liefde en respek te hanteer.
  • Dan praat ons nie óór mekaar nie, maar met mekaar.
  • Dán, glo ons, sal ons met ander oë na mekaar begin kyk en ook anders teenoor mekaar begin optree.

Ons, die lidmate van die VGK, NGK in Afrika, RCA en NGK, het ʼn verantwoordelikheid om iets hiervan binne ons samelewing te modelleer.

Hoe kan ons mekaar help in die ontwikkeling van volhoubare vriendskappe oor grense?

Dit sluit alle mense in ons breë gemeenskap in.

Kom gesels saam oor hoe ons almal saam die pad na heling kan loop – al vier kerke, as deel van die Seisoen van Menswaardigheid se strategie om die herstel van menswaardigheid in Suider-Afrika te bevorder. Dit is ʼn geleentheid om iemand van een van die susterkerke of uit die breër gemeenskap te nooi om saam met jou die dag by te woon en reeds só iets te beleef van die reis om oor grense heen na mekaar uit te reik.

Collin Goeiman van die VGK en Hannes Theron van die NGK, wat beide praktiese ervaring het van gemeentes wat die Loop Saam proses gedoen het, sal as fasiliteerders optree.

Wanneer: 22 Maart 2018

Waar: Communitas, Stellenbosch

Vir ‘n inskrywingsvorm, kliek hier:  VBO5 Loop Saam – Walking Together Eendag-werkswinkel

Vir meer inligting, of om jou voltooide inskrywingsvorm en betaalbewys te stuur, stuur ‘n epos aan Wilma

LW: Indien daar Engelssprekende kursusgangers is, sal die aanbieding in Engels wees, maar jy kan vrae en besprekings in die taal van jou keuse voer.

Tom Long oor Prediking en Aanbidding

Written by Wilma le Roux on . Posted in Ekklesia, Kursusse, VBO, Vennote

Kursus deur wêreldbekende homileet, die Rev. Dr. Tom Long

Ons is baie bevoorreg om in Maartmaand vir Prof Thomas Long is Suid-Afrika te hê vir `n paar predikantskursusse.

Prof Long is een van die bekendste en mees gerespekteerde homilete in die wêreld en sy boeke oor prediking en erediens word wêreldwyd voorgeskryf vir studente.  Hy het vir `n dekade of wat homiletiek aan Princeton Theological Seminary doseer voordat hy `n soortgelyke pos by Emory Universiteit se Candler School of Theology aanvaar het. Hy word vergesel deur sy vrou, Kimberly, ook ‘n homileet wat klasgegee het by Columbia Theological Seminary.

Hy sal op 12-13  Maart in Stellenbosch `n tweedag-kursus vir predikante aanbied rondom sy boeke The Witness of Preacing (oor die prediking) en Beyond the Worship Wars (oor die erediens, meer spesifiek verantwoordelike Blended Worship).

Dit beloof om iets besonders te wees.  Moenie dit misloop nie!

Vir ‘n inskrywingsvorm, kliek hier:  VBO4 Tom Long – Preaching-Worship

Stuur jou inskrywingsvorm en betaalbewys na Wilma

vóór 7 Maart!

Vir meer inligting oor Tom : http://candler.emory.edu/faculty/profiles/long-thomas.html

en Kimberly: https://en.wikipedia.org/wiki/Kimberly_Bracken_Long

 

Kontekstuele Sertifikaatkursus

Written by Wilma le Roux on . Posted in Kursusse, VBO

ʼn Eties Relasionele benadering  (kontekstueel) 

as gerigtheid in huweliks-, gesins- en verhoudingpastoraat

Die mens voor jou… terminaal; sterwend;  dwelmafhanklik; ontrou; vrolik; bedrywig… het ʼn konteks. Hy/sy is die kind van ʼn ma en ʼn pa en hulle van ʼn ma en ʼn pa. Binne hierdie netwerk van verhoudinge word boodskappe aangegee soos ʼn aflosstokkie wat generasies lank kan duur en mense beïnvloed. Hoe daarmee gemaak?

Kom ontdek saam ʼn openbarende aanpak in die pastoraat aan mense… enkel of in verhoudinge

Hierdie kursus is geskoei op die werk van die Hongaarse psigiater Ivan Boszormenyi-Nagy en deelnemers word begelei in die verstaan van die ‘grootboek’ van krediete en debiete en die fyn spel in die dampkring van lojaliteit tussen gee en neem van mekaar. Dit het ten doel die bewusmaking dat elke mens nie uit die lug val nie maar deel is van ʼn netwerk van relasies deur generasies heen in die verlede maar ook generasies wat kom.

Hierdie sertifikaatkursus wat plaasvind as drie modules van 3 dae elk, word aangebied vir

  • leraars maar ook
  • lidmate met ʼn belangstelling in die pastoraat of
  • dienswerkers betrokke met pastoraat in gemeentes

Dit is nie net ʼn inleidende kursus in hierdie benadering nie, maar ook ʼn inoefening deur gesprekke en gevallestudies wat deelnemers in staat stel om dit in hul pastorale bediening te benut. Begrippe soos lojaliteit, gesplete lojaliteit, vertroue, betroubaarheid, dialoog, erkenning, skuld, rolerende rekening, eksonorasie en meersydige partydigheid kom in spel. Terwyl ons egter ook in Afrika is met haar filosofie ‘ek is mens deur ander’ kom begrippe soos verbondenheid (connectedness en inter-connectedness) asook gasvryheid en sorgdra ook in spel.

Uitkomste van die kursus:

    • ʼn verstaan van ‘konteks’ as familie en gemeenskapsnet
    • wat lojaliteit beteken en die dinamika en invloed daarvan in verhoudinge
    • insig te hê in die dialogiese perspektief in verhoudinge
    • om te onderskei tussen ‘etiek’ as eksistensieel en nie as moraliteit nie
    • om ʼn destruktiewe nalatenskap om te draai tot konstruktiewe nalatenskap
  • om hierdie benadering te ontdek as hoop- en hulpvol in die pastoraat
  • ʼn vaardigheid om met hierdie benadering om te gaan in die pastoraat.

Om in te skryf, kliek hier om ‘n registrasievorm af te laai: VBO3 Kontekstuele Sertifikaat

en epos dit na Wilma

 

Lidmate kan ook preek!

Written by Wilma le Roux on . Posted in Kursusse

LIDMAATPREDIKER

SERTIFIKAATKURSUS

Die Lidmaatpredikerkursus lei mense wat geen teologiese opleiding ontvang het nie, op om in hulle gemeentes hulle predikante by te staan en aan te vul in prediking.

Die kursus verskaf basiese opleiding in:

  • • Die aard en wese van prediking in ‘n gemeentekonteks (Ekklesiologie)
  • • Die vermoë om Bybeltekste uit te lê met die oog op prediking (Hermeneutiek)
  • • Die aanleer van ‘n kommunikasiemodel vir prediking (Homiletiek)

Duur van die Kursus

Die kursus strek tans oor ‘n tydperk van ses maande en bestaan uit die volgende komponente:

  • • Kontaksessie 1 (Ekklesiologie en Hermeneutiek)
  • • Kontaksessie 2 (Homiletiek)
  • • Werkopdrag 1 (Hermeneutiek) – drie maande na die eerste Kontaksessie
  • • Werkopdrag 2 (Preekraamwerk) – drie maande na die tweede kontaksessie
  • • Werkopdrag 3 (Proefpreekverslag) – na afloop van die proefpreek in ‘n gemeente

Na afloop van die kursus word ‘n Sertifikaat van Voltooiing uitgereik wat verklaar dat die kursus suksesvol deurloop is.

Mentorskap

Elke student se tuisgemeente se predikant tree op as mentor. Studente mag egter ook ‘n ander predikant versoek om as mentor op te tree. Studente moet by inskrywing reeds ‘n verhouding met die mentorpredikant hê, want hierdie persoon gaan die student begelei tydens die aanleer van hermeneutiese vaardighede, asook die lewer van die proefpreek.

Elke student word geleer dat hulle ‘n bepaalde (enkel)-bedieningsfunksie in hulle gemeentes verrig, naamlik prediking. Dit is dus nie ‘n onafhanklike bediening nie, maar geskied op uitnodiging en onder toesig van die gemeentepredikant.

Die mentorpredikant evalueer die proefpreek se gehalte saam met ‘n luistergroep wat evaluasievorms invul en gee aan ons verslag oor die student se vermoë tot kommunikasie, eksegese, ens.

Die program behels 2 kontaksessies:

Kontaksessie 1 – 16 tot 17 Februarie 2018 by die NG Kerk, Brackenfell-Wes  (Janiestr 4, Brackenfell).

Vrydagaand 16:00 tot 21:00 en Saterdag 09:00 tot 17:00

‘n Middagete word voorsien.

Kontaksessie 2 – Die datum vir die tweede sessie word by die eerste kontaksessie bepaal, en vind op ‘n Saterdag plaas van 09:00 tot 17:00;

‘n Middagete word ook voorsien.

Om in te skryf, of vir navrae en meer inligting oor die inrigting van die kursus, kontak gerus die kursusleier :

Dr Guillaume Smit – ghsmit@telkomsa.net (Selno: 083 306 1561)

 

 

 

Dag van Verootmoediging

Written by Wilma le Roux on . Posted in Nuus

Verskeie kerkgenootskappe doen ‘n beroep op alle landsburgers om Woensdag 14 Februarie 2018 ‘n dag van verootmoediging te maak. Hierdie oproep geniet reeds die steun van die moderature van die NG Kerk in Wes-Kaapland, die VGK Kaapland, die NG Kerk in Oos-Kaapland, die Congregational Kerk, die Presbiteriaanse Kerk en die Evangelical Lutheran Church of Southern Africa (ELCSA).

14 Februarie is Aswoensdag, die begin van die lydenstyd in die kerkjaar.
“Ons bede is dat in die lig van die droogte die hele lydenstyd vir die kerk van Christus ‘n tyd van verootmoediging en gebed sal wees.

Ons versoek gemeentes om op 14 Februarie vanaf 12:00 hulle kerkklokke vir ‘n tyd te lui om sodoende almal in ons gemeenskappe op te roep tot gebed en verootmoediging.
Ons versoek ook gemeentes om deur die loop van hierdie dag in elke gemeenskap ‘n spesiale gebedsbyeenkoms te hou.”

Nelis Janse van Rensburg se skrywe is hier

(Met erkenning aan Vrydagnuus 1/2/2018)

Missionaliteit as Entrepreneurskap

Written by Wilma le Roux on . Posted in Kursusse, VBO

Hoe om jou geloof

prakties te kan uitleef

in die konteks van

ons tyd!

“What is Missional Entrepreneurship? Where business, mission, philanthropy, creativity, and theology intersect. In short, an entrepreneur on a mission with God.”

Business As Mission (BAM)

Missionaliteit as Entrepreneurskap: die praktiese uitleef van geloof met groot opwinding! is ‘n kursus wat plaasvind van 30 Januarie tot 1 Februarie 2018 by Communitas, Stellenbosch.

Die tafel is gedek! Ons beleef ‘n tyd met van die grootste uitdagings, geleenthede en opwinding vir gelowiges in ons land se geskiedenis. Groei as persoon en gelowige kan gewaarborg word omdat dit so in praktyk is dat mens voel asof jy langs die Here loop.

Soveel leiers op alle fronte, plaaslik en internasionaal, beklemtoon die relevansie van entrepreneurskap en die gepaardgaande verandering in denke wat nodig is vir die voortbestaan van die mensdom in geheel. Veral in Suid-Afrika het ons hierin ‘n hele aantal grense om oor te steek. Gelowiges het ‘n wonderlike venster-periode geleentheid. Die kerk se wiel draai stadig maar dit het reeds begin draai met die ASM se jongste besluite oor gemeentes se rol tov armoede en werkloosheid. Die vraag is: Hoe pro-aktief kan die kerk wees?

Klem val in die kursus op die noodsaaklikheid, huidige stand en metodiek van entrepreneurskap-ontwikkeling, as komponent van die kontekstualisering van die kerk. Die aanpassings van ons denkraamwerk (mindset) blyk ‘n hoë prioriteit te wees, nie net tov ons jeug en werkloses nie maar ook by dié wat as gestuurdes hul roeping wil uitleef. Daarom kry die hervormingsproses van die persoonlike denkraamwerk groot klem in die kursus.

Die breë raamwerk lyk as volg:

  1. Teologiese fundering van Missionaliteit en Entrepreneurskap in kombinasie
  2. Entrepreneurskapsontwikkeling se huidige stand en toekomstige rol in konteks van die wêreld, Afrika en Suid-Afrika
  3. Die identifisering en betekenis van vernuwende denke (mindset) op persoonlike en kerklike vlak, as die mees belangrikste element vir entrepreneuriese denke-ontwikkeling in Suid-Afrika
  4. Ontginning in praktyk vir gelowiges in die kreatiewe wêreld van entrepreneurskap

Die doel van die kursus is om bedienaars van die Woord toe te rus met die nodige kennis en vaardighede om ‘n leierskap- en bestuursrol te vervul in die begeleiding van gelowiges se uitlewing van geloof in die konteks van ons tyd.

Vir ‘n inskrywingsvorm, kliek hier: VBO2 Missionaliteit as entrepreneurskap

Vul in en stuur saam met jou betaalbewys na Wilma

Vóór Woensdag 24 Januarie!

KATEGESE VIR DIE VOLGENDE GENERASIE

Written by Wilma le Roux on . Posted in Jeug en familie, Kursusse

Padkaart na kategese  vir die volgende generasie!

 

Die geloofsvorming raamwerk, die nuutste navorsing en kontekstuele nadenke bied ‘n padkaart om kategese te herontwerp vir die volgende generasie!

Hierdie kursus word aangebied deur die Taakspan vir Jeug en Familie Bediening olv Anriëtte de Ridder 

en vind plaas op 30-31 Januarie by Communitas, Stellenbosch.

Tydens die kursus gaan julle kyk na die teologiese raamwerk vir geloofsvorming en hoe kategese steeds ʼn belangrike deel daarvan vorm.
Ons gaan ook saam dink oor hoe kategese in ʼn nuwe konteks en generasie ʼn nuwe vorm aanneem – die nuutste navorsing gee vir ons perspektief oor hoe ons vars uitdrukking aan antieke beginsels kan gee.
Verskillende kontekstuele benaderings (byvoorbeeld stad, platteland, klein, medium en makro gemeentes) sal ook aandag geniet.

Die Kategese taakspan van die Algemene Sinode se boekie “Geloofsvorming herontwerp” beskryf 12 bakens vir geloofsvorming wat as subtemas vir die gesprekke sal dien. Daar sal ook deurgaans saam gesoek word na “best practices” wat jou gemeente kan help om effektiewe geloofsvorming te fasiliteer.

Julle gaan dus saam na die volgende aspekte kyk:

  • Teologiese grondbeginsels en Bybelse perspektief vir geloofsvorming
  • Die uitdagings vir kategese en geloofsvorming vandag
  • Leidrade wat die nuutste navorsing vir ons gee
  • Kategese as deel van ʼn groter jeugbediening-strategie
  • Kontekstuele toepassing
  • Nadenke oor belydenisaflegging
  • Die proses van dissipelskap en mentorskap
  • Kategese materiaal keuse
  • Ouers se betrokkenheid en rol

Om in te skryf:

Vul die inskrywingsvorm in wat jy hier kan kry: VBO1- Kategese vir die Volgende Generasie

en epos dit dan na Wilma

Doen dit asb vóór 24 Januarie!!