Author Archive

SPEKBOME VIR ONS MA’S op Moedersdag

Written by Mariette Steyn on . Posted in Argief Vrouelidmate

deur Dawfré Theron

spekboomWelgemoed Gemeente

Ons het 250 spekbome uitgedeel aan elke ma wat die oggenddiens bygewoon het.

Die boodskap vir die moeders was dat ons elke moeder ‘n geseënde Moedersdag toewens. Die teks het gekom uit Handelinge 2:14-42. Die boodskap het iets probeer deel van geestelike “wellness”/heelheid/ gesondheid. Vir ons as Christene om geestelike “wellness” te kan hê, het ons nodig om seker te maak dat die omgewing waarin ons bly ook gesond is. Daarmee resoneer die idee van ‘n spekboom, wat beskou word as die “boom van die lewe”. Spekbome is een van die plantsoorte wat die heel meeste koolstofdioksied uit die lug absorbeer. Hierdie eenvoudige plant kan ‘n baie groot verskil maak om klimaatsverandering in die wêreld te hanteer. Dit is sommer vir ons ook ‘n voorbeeld van die groot verskil wat ‘n oënskynlike nietige plant kan maak. So kan mense wat dalk gering voorkom, ook ‘n groot verskil maak in ons land. Moeder Aarde is vir ons ‘n bron van lewe, een wat sorg, een wat voed en een wat voorsien. Is jy ook iemand wat liefde is, iemand wat sorg, iemand wat voorsien? Dan is jy vir ons van onskatbare waarde. Die spekbome is in bio-afbreekbare potjies geplant en kan dus direk in die grond geplaas word – sonder om dit eers uit te plant. Die idee dat die moederplant op die kerkterrein geplant gaan word en dat elke moeder ‘n steggie van die plant by die kerk ontvang het, is vir ons ook iets besonders.

Ons het baie positiewe terugvoer ontvang. Die moeders was gaande oor die idee! Daar is wel so tong-in-die-kies verwys na die spekkies van die moeders, of die suggestie dat ons vetplante uitdeel! Die idee van ‘n “boom van die lewe” het egter hierdie grappies gou in die kiem gesmoor.

“ViX” CITRUSDAL Vrouens in Christus

Written by Mariette Steyn on . Posted in Argief Vrouelidmate

deur Madelein Horn

ViX (Vroue in Christus) in Citrusdal het besluit om ons slagspreuk “GEE, GLO EN GROEI” weer uit te leef in alle projekte. Met hierdie “logo” in gedagte het die volgende projekte reeds vanjaar plaasgevind.

Citrusdal2

Praise & Worship
Ons tema vanjaar sluit aan by ons gemeente se visie vir  2014  “maak dissippels…”

Tydens ons somerbyeenkoms was ons opdrag ”wees sout vir die wêreld” en gee smaak aan ons daaglikse bestaan met al sy probleme deur die verskil wat net jy kan maak. Ons het ‘n paar gelowige moeders uit Oranjeville genooi wat ernstige probleme met hul eie kinders het agv dwelmafhanklikheid. Hul getuienis was vir baie van ons ‘n openbaring van die houvas van sosiale euwels soos Tik en drank op ons eie gemeenskap se jeug. Saam het ons gehuil en voorbidding vir hulle en vir ons gemeenskap gedoen.

Ons winterbyeenkoms se tema was “wees wierook en versprei ‘n aangename geur”.

Gebruike van wierook en die simboliese waarde daarvan in die Ou en Nuwe Testament is deur ons groepleier, Susan Mostert, gedeel. Terwyl die geur van wierook die saal gevul het, het ons lofsang en aanbidding opgeklink tot eer van God. Annatjie Mouton het kom getuig oor hoe sy haar wierookgeur versprei deur gemeenskapsbetrokkenheid by die slagofferondersteuningsdiens aan die SAPD en die verskaffing van toebroodjies aan pasiënte by ons plaaslike kliniek. Dikwels word daar lang ure gewag op mediese sorg  agv die groot getal seisoenwerkers wat Citrusdal gedurende die sitrusoestyd  binnekom. Sy het ook kragtig getuig van die vrede wat sy ervaar het en die merkwaardige herstel na haar onlangse operasie. Ons het afgesluit met heerlike pannekoek wat sy eie geur van nostalgie meegebring het!

Vrouekamp
Ons jaarlikse kamp het vanjaar weer plaasgevind by die pragtige rustige “De Vlei” – ‘n kampplek langs die Olifantsrivier – rustig, sonder enige geraas – net ons, ons Skepper en die pragtige natuur rondom ons. Die kamp is vanjaar bygewoon deur 20 vrouens (ouderdomme het gewissel van 23 tot 60) – die aanbieder was  Amanda Versfeld van die Bright Star-program. Die tema van die kamp was “Skitterende Verhoudings” en “Skitterende Leierskap” waar ons onder andere konflikhantering, kommunikasie, is ek ‘n voorbeeld wat ander wil navolg, ens. behandel het.

Die vrouens is in vier groepe ingedeel met ‘n mentor. Met ons aankoms by die kamp, het elke vrou ‘n “geskenkpakkie” ontvang en binne die geskenkpakkie was  die mentor se naam – geen vrou het dus voor die tyd geweet wie is haar mede-groepslede of mentor nie.  Dit was net vir ons wonderlik om te sien hoe was God se hand ook in hierdie indeling vir die groepe – vrouens wat bymekaar “gehoort” het, het bymekaar uitgekom.  Tydens hierdie kamp is daar weer baie gelag, maar ook baie gehuil.

Weer eens was hierdie kamp ‘n geestelike belewenis vir die 20 vrouens wat dit bygewoon het. Hegte vriendskappe is gesmee en ‘n ondersteuningsnetwerk is opgebou, sodat hierdie 20 vrouens ook in die gemeente van Citrusdal ‘n verskil kan maak. Ons vrouens kan nie meer wag vir 2015 se kamp nie!!

Citrusdal1

Dankbaarheidsprojekte
Gedurende die jaar het ons verskeie dankbaarheids-projekte waar ons die mense in ons gemeente wat ‘n onbaat-sugtige diens lewer, bederf  met heerlike eetgoedjies. So is daar bv polisie, onderwysers, dokters, verpleeg-personeel, klinieke, hospitaal, bybelskool-fasiliteerders, Jeugkerk-personeel, BADISA-personeel, kerkpersoneel, omgeegroepe, peuterkerk personeel, kleuterkerk tannies/ooms, kerkkoor, voorsanggroep en kategete.

Die dankbaarheid waarmee hierdie eetgoedjies ont-vang word, is net absoluut wonderlik en ‘n mens besef net weer eens wat beteken die woordjie “dankie” …

Citrusdal3Ander projekte

  • Die Wêreldbiddag vir Vroue wat aangebied word vir alle vroue in Citrusdal oor kleurgrense en kerke heen, is weer baie goed aangebied deur Amanda Versfeld en vrouens uit die Citrusdal gemeente wat met sang en gebed gelei het.
  • Kwartaalliks word Ons Huis (ouetehuis) ook bederf met heerlike eetgoedjies, bv. vrugte, paaseiers, plaatkoeke, pannekoeke, ens.
  • Elke wyk kry ook ‘n beurt vir ‘n noodkospakkie wat in ‘n wyk ingesamel moet word om te help met die behoeftige gesinne/persone in die breë gemeenskap
  • Gedurende Pinkster word die gemeente elke aand heerlik bederf met sop en broodjies direk na die Pinksterdiens
  • Sondag 8 Junie kon ons mammas en pappas agter-oor sit en ‘n heerlik ViX-ete kom koop vir die gesin

Komende projekte vir 2014

  • Einde Julie word die kerkdiens gelei deur ‘n vroueprediker, Lettie Buchner, van Wellington – die hele kerkdiens word georganiseer en gelei deur die ViX bestuur
  • November is ons jaarlikse kersmark met ‘n gaskunstenaar – indien enigiemand ‘n stalletjie by die kersmark wil beman, kontak ons gerus.
  • Ons afsluiting vir die jaar is die ViX Kersete waar die gemeente heerlik kan saambraai in ‘n kersfeesatmosfeer met Kersvader, gedekte Kerstafels, ens.

ViX in Citrusdal pak alles met ‘n blye gemoed aan, want  alles wat ons doen, doen ons tot eer van God wat ons elke dag die krag gee om diensbaar vir Hom te wees. Mag die Here ook, vir die res van 2014, Citrusdal se vrouens en vrouens wêreldwyd seën sodat ons oë altyd op Hom gerig sal wees.

Oggend in Somerset-Wes, Moedergemeente

Written by Mariette Steyn on . Posted in Argief Vrouelidmate

Swes-1

Cecile skryf van hierdie heerlike oggend en dat dit ‘n verrykende ervaring was waar die vroue van Somerset-Wes en Strand uit die kas gedink en interessante belewenisse gehad het.

Die Geloofsreis vir vroue was ‘n nuwe ervaring en hul foto’s vertel die storie van ‘n besielende oggend waar vroue elkeen self kon hoor wat die Here vir hulle wou sê.

Oud en jonk het dit geniet en om saam te gesels en in mekaar se lief en leef gedeel.

Die dames het dit so geniet, dat ‘n opvolgsessie beslis moet volg.  Ons glo dat hulle ook reeds heerlike saam met hul nuwe geloofsvriendinne reis en God se stem hoor.

Geloofsreis-aand in Vrijzee, Vasco & Goodwood

Written by Mariette Steyn on . Posted in Argief Vrouelidmate

deur Estelle van Vasco

Dit was ‘n voorreg om so ‘n unieke aand te kon beleef!

In ons besigwees met alles en almal vergeet ons totaal van onsself – tot Dinsdagaand toe Antoinette Muller en Mariëtte Steyn ons op ‘n geloofsreis geneem het.
Ons vroue het ons harte oopgemaak en was ontvanklik. Ons het diep geluister en die aand met al sy oomblikke omhels.

In die rustige, amper gewyde oomblikke het ons uniekheid ervaar. Op ons reis het ons besef dat God se Gees ons sterk maak en lei deur goeie en slegte tye.
Ons het saam rondom Eva se Gebed die wêreld in die oë gekyk en ingehak by mede-vriendinne en so geborgenheid in ons liefwees vir mekaar gevind.

goodwood

Toe ons kaalvoet in Maria se skoene klim, het ons besef God gebruik gewone, eenvoudige mense om sy doel te bereik. Is ons altyd soos Maria beskikbaar?

Luister ons in gehoorsaamheid na sy influisteringe?

Heerlik die wete: God berei ons voor vir Groter dinge as onsself, want niks is vir God onmoontlik nie.

Die aand kom tot ‘n einde, maar ons voel soos pelgrims op reis … met vlerke!!!!

Wintertyd – hoe raak dit ons?

Written by Mariette Steyn on . Posted in Argief Vrouelidmate

winter
deur Mariëtte Steyn

“Agge nee, dis alweer winter! Wanneer hou die reën en koue op. Ons kan vandag alweer nie buite speel nie.” My skoondogter vertel dat ons vierjarige kleinseun wintersoggende so begroet. Hy hou nie van winter en sy beperkings nie en dit laat my terugdink aan myself so 35 jaar gelede. As jong mamma was ek ook vasgevang deur die winter. Sonder “malls” waar jy onderdak kon parkeer, was dit maar moeilik om die weeklikse inkopies met baba in die stootwaentjie en die winkeltrollie aan die ander hand, te hanteer. En dan reën jy ook nog nat oppad motor toe.

Vandag kyk en ervaar ek winter anders. Dis nie meer so ontwrigtend nie. Maar, dit IS winter. Die Kaap is nat en koud en baie mense kry swaar. Die reën en koue maak die nood aan huisvesting en kos net groter. Hier by ons is daar mense wat in bushokkies en op winkelstoepe slaap, onder brûe, teen heinings – hulle hoort nie daar nie, maar hulle het geen ander skuiling teen hierdie koue, nat winter nie. Soms wil ons net ons ore en oë toeknyp en ons kop in die sand druk, maar is dit wat Jesus met die wêreld doen? Knyp Hy sy oë, ore en hart toe vir ons nood? Nee, hy sien ons hartseer en swaarkry en kyk met deernis na ons. Hy sien ook ons hardvogtigheid, onwilligheid en bly steeds lief vir ons.
Wat maak ons om vir Hom iets terug te gee?

Ek lees die afgelope naweek in Onrusrivier se afkondigingsblad, Hartklop, ‘n aangrypende storie wat ek graag met julle deel: Robert Louis Stevenson (die skrywer van o.a. Treasure Island en Kidnapped) is in 1850 gebore en het in Edenburg, Skotland groot geword. Dit was nog in die dae van olie straatlampe. En hy kon goed onthou hoe die man wat elke laatmiddag die lampe moes aansteek, met sy trapleertjie tot by die lamppaal gekom het, versigtig opgeklim en die lamp aangesteek het. Stevenson vertel wat die grootste indruk op hom gemaak het, was dat die lampaansteker nooit verder gegaan het as hy nie eers ‘n lig agtergelaat het nie.

Ons is ook soos hierdie lampaansteker. Ons is geroep om lampe aan te steek en lig te maak. Doen ons dit?
Hoe kan ek ‘n lamp aansteek en vir iemand lig maak?

Snoesige gebreide kombersie …

Written by Mariette Steyn on . Posted in Argief Vrouelidmate

BENODIGDHEDE
• SIRDAR TIMY TOT DL of enige ELLE DK in kleure van jou keuse – 4 van A, 3 van B en 2 van C (50g-balle)
• 4mm-breinaalde

MATE
Ongeveer 61 cm x 76 cm

Brei 'n laslapkombers

SPANNING
Spaar tyd en doen eers ‘n spanningstoets
21 ste en 42 rye = 10 cm oor reksteek met 4 mm-naalde

Vir die beste resultate is dit belangrik om die regte spanning te hê. As daar te min steke op die toetslappie is, gebruik dunner naalde; as daar te veel steke op is, gebruik dikker naalde

AFKORTINGS
alt – alternatiewe
aw – aweregs
beg – begin
herh – herhaal
ks – koussteek
oorbl – oorblywende
pat – patroon
r – regs
rs – regsteek
R(V)K – regte (verkeerde) kant
R(V)KV – regte (verkeerde) kant voor
st(e) – steek(steke)
tes – tesame
vermin – verminder
vermeer – vermeerder
vlg – volgende

REKSTEEKBLOK (MAAK 20)
Met 4 mm-naalde en duimmetode en Bol A stel 65 ste op.
1ste ry: Met Bol A, r. Hierdie ry sal nou bekend staan as rs (regsteek).
2de ry: r31, r3 tes, r31.
63 ste
3de ry: r
4de ry: r30, r3 tes, r30
61ste.
Werk in rs en r3 tes in middel van elke vlg alt ry soos tevore (deurgaans) en gaan soos volg voort:
Werk nog 12 rye. 49 ste.
Met Bol B werk 16 rye. 33 ste.
Met Bol C werk 16 rye. 17 ste.
Met Bol A werk 14 rye. 3.
63ste ry: Met A, r.
64ste ry: Met A r3 tes, 1st.
Breek draad af en werk weg.

OM TE VOLTOOI
Werk blokke in 4 stroke van 5 blokke elk met patroon telkens in dieselfde rigting.
Werk stroke aan mekaar en sorg dat hoeke mooi ooreenkom.
Lê plat neer, bedek met klam lap en laat om droog te word.
(Ons dank aan Vrouekeur, November 2011.Red)