Die fokus op die ewige lewe en spesifiek v12 se aanname naamlik wie die Seun het, het die ewige lewe en wie die Seun nie het nie, het nie die ewige lewe nie, sal nie na almal wat na ons preke luister ewe maklik kom nie.

Daar is elke Saterdag in Die By ‘n onderhoud met ‘n bekende persoon. Dieselfde reeks vrae word aan almal gevra, waarvan een is: Wat gebeur na die dood? Die antwoorde is uiteenlopend van niks tot re-inkarnasie. Ek kan nie onthou dat iemand al min of meer in lyn met ons teks geantwoord het oor die ewige lewe nie. Ek wonder daaroor. Ek vermoed ‘n aantal jare gelede sou minder mense dit waag om in die publiek te verskil van een van die belydenisse van die kerk. Nou blyk dit dat niemand graag met die kerk hieroor wil saamstem nie. Oor die redes kan ons lank spekuleer, maar dit is iets waarvan ons sal moet kennis neem as ons oor die teks preek.

Voeg ons nog v 12 daarby dat die ewige lewe (net) bestem is vir hulle wat die Seun het, kan ons aanvaar dat daar mense sal wees met baie vrae in hulle gemoed hieroor.