Ons kyk terug na ‘n suksesvolle Kinderkonferensie

Written by webmaster on . Posted in Jeug en familie, KIX-KOM

Ons loop nog op die wolke na Kix se opwindende Kinderkonferensie op 11 en 12 September 2018. Baie Kix-leiers en ander kinderbediening-leiers uit alle denominasies is “Toegerus vir die Toekoms”. Ons is die Here baie dankbaar vir al die Kix-leiers wat getroue kinders van Jesus is en beter toegerus is vir hul bediening.

Videogrepe van die hoofsprekers se aanbiedings asook van ‘n paar werkswinkels wat aangebied is, sal binnekort op hierdie webtuiste beskikbaar wees.

Ons het ‘n baie bedrywige en geseënde jaar by Kix agter die rug! Vanjaar het die eerste Engelse vertalings van die Kix-ontmoetings die lig gesien. (Dit is op hierdie webtuiste beskikbaar.) Die “Jesus vir Japan”-projek het gesorg vir wonderlike kreatiewe ontmoetings en fondsinsamelings asook verdiepte verhoudings met ons vennote by Missie Japan.

Mag jy die laaste kwartaal van 2018 ook soos Paulus in 1 Timoteus 1:12 getuig: “Teenoor Christus Jesus ons Here is ek dankbaar: Hy het my krag gegee en my betroubaar geag om my in sy diens te stel.”

Ons verwelkom Maryke Fourie in die Jeugkantoor. As ‘n jong oud-onderwyseres en langafstandatleet is ons seker sy het oorgenoeg kreatiwiteit, ervaring en energie vir die Jeugkantoor. Maryke, ons bid vir jou ‘n geseënde tyd toe in jou nuwe werksomgewing.

Waarna sien ons uit in 2019? ‘n Splinternuwe projek word aangepak, naamlik Kix na Kenia. Ontmoetings in Afrikaans en Engels word op die oomblik geskryf oor die dissipels, oor Petrus se lewe en oor Jesus se gelykenisse en wonderwerke. Ons visie is dat al hoe meer gemeentes en individue Kix.Kom sal gebruik om kinders in kerke, skole, nasorgsentrums en gemeenskapsale te bereik vir Jesus!

Vriendelike groete, Anriëtte de Ridder

Dokumente

Foto’s van die konferensie

Die Kinderkonferensie is om die draai!

Written by webmaster on . Posted in Jeug en familie, KIX-KOM

“I can’t change the direction of the wind, but I can adjust my sails to always reach my destination.” (Jimmy Dean)

Die wêreld verander so vinnig en soms voel ‘n mens oorweldig deur al die uitdagings wanneer jy kinders begelei. Die Kix-Konferensie “Toegerus vir die Toekoms” is ‘n ideale geleentheid vir jou en ander Kix-leiers, kategete, jeugleiers, ouers, jeugwerkers en predikante om oor die geleenthede van die toekoms na te dink. Kom luister na relevante sprekers, woon praktiese werkswinkels by, ontdek nuwe hulpbronne en netwerk met ander kinderbedieningsleiers.

Nooi jou mede-Kix-leiers en ander belangstellendes om saam te ry en skryf dadelik in vir dié geleentheid op 11 en 12 September 2018. Die inskrywingsfooi van R300 per persoon sluit al die sessies deur die hoofsprekers, ‘n aantal werksessies (met benodigdhede), koffie, tee en middagetes vir albei dae in. (Kontak gerus die kantoor vir ‘n borg as jul hulp benodig.) Inskrywings kan gedoen word deur aanlyn by https://goo.gl/forms/sDipMigRwOnZzrsj1 te registreer.

Kom span jou seile sodat jy op die winde van verandering kan vaar! Ons sien daarna uit om jou daar te verwelkom.

Onderwerpe van die hoofsprekers:

  • Hoe kan ons ons kinders toerus vir die toekoms?
  • Die binnewerking van kinders met uitdagings
  • Kinders in vandag se skolekonteks
  • Die impak van tegnologie op kinders

Kursusgangers kan elke dag twee van die volgende werkswinkels bywoon:

  • Tekentegnieke
  • Leer buikspraak met handpoppe
  • Hoe begin ons ʼn Kix-groep?
  • Kreatiewe gebed met kinders
  • Fasilitering van ʼn groepie
  • Hantering van boelie-gedrag
  • Depressie onder kinders
  • Gewoontes in die huis
  • Kinders en musiek
  • Aanbiedingstegnieke
  • Bediening in skole
  • Gebruik tegnologie in kinderbediening

JAMMER!

Die Jeugkantoor vra om verskoning vir versendingsprobleme wat met die tweede kwartaal se Kix.Koms gepaard gegaan het. Indien jy enige probleme ondervind het wat nog nie aangespreek is nie, kontak ons asseblief per e-pos by jeug@sun.ac.za of telefonies by 021 808 9050.

 

Toegerus vir die Toekoms

Written by Wilma le Roux on . Posted in Jeug en familie, Kinderbediening, KIX-KOM, Konferensies, Tieners, VBO

KINDERKONFERENSIE

11 en 12 Sept 2018 NGK Kuilsrivier-Suid

Gemeente-predikante/pastore, jeugwerkers, kinderwerkers, kategete, Kix-leiers, kinderbond-leiers, kinderkerk-aanbieders, ouers of enige ander persoon wat belangstel in kinderbediening, word uitgenooi na die 2018 Kinderkonferensie wat aangebied word deur die Jeugkantoor van Communitas en Kix.

 

 

 

 

 

 

 

 

KYK TERUG OM TOEGERUS TE WEES VIR DIE TOEKOMS
Die fokus van die Kinderkonferensie is om almal wat met kinders werk op hoogte te bring met die globale, Suid-Afrikaanse en kerklike tendense wat ons werk met kinders beïnvloed. Luister na kundige sprekers wat gesels oor die toekoms, die kind se wêreld in skole, kinders se binnewêreld en die impak van tegnologie op ʼn kind. Ontmoet en netwerk met ander leiers in die veld van kinderbediening. Kry praktiese toerusting in ‘n wye verskeidenheid relevante en eietydse werkswinkels. Kom, word toegerus met kennis, vaardighede, hulpmiddels, en hope inspirasie!

 

 

 

 

 

 

Daar tree 4 hoofsprekers op, en dan word daar ook oor die twee dae 12 werkswinkeltemas aangebied. Elke deelnemer kan kies om twee werkswinkels per dag by te woon.

Hoofsprekers: 

Doris Viljoen, Senior Toekomskundige by die Instituut vir Toekomsnavorsing

Gert van der Merwe, predikant van Lynnwoodrif Gemeente in Pretoria en portefeulje-leier van ToekomsNou

Hugo Theron, kliniese sielkundige; kundige oor die gebruik van sosiale media en die impak daarvan op tieners

Siegfried Louw, predikant in Proteahoogte Gemeente, spelterapeut en lewensafrigter

Kliek hier vir meer oor die hoofsprekers: HOOFSPREKERS

Werkswinkeltemas: 

K1 : SKETSBORD TEGNIEKE
K2 : GEBRUIK BUIKSPRAAK IN JOU BEDIENING
K3: HOE BEGIN EK ’N KIX-GROEP IN ENIGE KONTEKS
K4: KREATIEWE GEBED MET KINDERS
K5: FASILITERING VAN ‘N GROEP
K6: HANTERING VAN BOELIE-GEDRAG
K7: DEPRESSIE ONDER KINDERS
K8 : GEWOONTES IN DIE HUIS
K9 : KINDERS EN MUSIEK
K10 : STORIEVERTEL TEGNIEKE
K11: LEEF JOU ROEPING UIT IN DIE SKOOL
K12 : GEBRUIK TEGNOLOGIE IN KINDERBEDIENING

Vir volledige detail oor elke werkswinkel, kliek hier: WERKSWINKEL ONDERWERPE

Om in te skryf, kliek hier vir die inligting en registrasievorm: REGISTRASIE BESONDERHEDE en REGISTRASIEVORM
Stuur jou voltooide registrasievorm na Maryke
Vir enige navrae kontak Maryke by 021-808 9050

ONS DEEL OPWINDENDE NUUS!

Written by webmaster on . Posted in Jeug en familie, KIX-KOM

Teen hierdie tyd is almal al goed op dreef met Kix 2018 se ontmoetings: “Vreemde en Crazy stories in die Bybel”. Ons is dankbaar oor elke Kix-leier wat met die kinders werk in gemeentes, gemeenskappe, skole en nasorge. Ons hoor ook hoe Kix-groepe besig is om te woeker met die “Jesus vir Japan”-projek en ons hoor van kinders wat al in Japannees kan groet! Stuur gerus jul foto’s en video opnames vir ons om te deel.

Ons verwelkom Ronelle de Graaf as die nuwe sekretaresse in die Jeugkantoor. Skakel haar gerus vir enige navrae oor Kix-sake (e-pos: jeug@sun.ac.za; telefoon: 021 8089050).

Opwindende nuus is dat die Kinderbedieningskonferensie om die draai is: 11 en 12 September 2018! Kix hou gewoonlik elke 4 jaar ‘n een-dag sinode waarheen alle Kix-leiers genooi word. Hierdie jaar hou ons ‘n groter twee-dag Kinderkonferensie waarheen ons ook alle ander kinderbedieningsleiers nooi. Dus word alle gemeenteleiers, predikante, kategete, ouers, oumas en oupas, onderwysers, jeugwerkers en almal wat met kinders werk, ook uitgenooi. Die konfe-rensie se tema is: “Toegerus Vir Die Toekoms”. Die dinamiese sprekers en praktiese werkswinkels sal oor ‘n verskeidenheid temas handel wat hierby aansluit. Kom leer hoe om tegnologie in te span, met ouers te werk en die nuwe geslag kinders (Generasie Y) beter te verstaan. Kom kry nuwe aanbiedingsidees en leer om kreatiewe vaardighede te gebruik. Kom koop hulpmiddels en kom gesels met ander mense en bedieninge wat met kinders in Suid-Afrika werk. Jy sal verseker toegerus wees vir die toekoms na hierdie heerlike twee dae! Die konferensie sal plaasvind in die noordelike voorstede van Kaapstad, maar die presiese plek en reëlings sal nog deurgegee word. Slaapplek en vervoer word deur deelnemers self gereël.

Ons sien daarna uit om jou en jou mede-Kix-leiers (en almal wat met kinders werk) daar te verwelkom!

Vrede en vreugde

Ds Anriëtte de Ridder

UIT ‘N ANDER HOEK

Written by webmaster on . Posted in Jeug en familie, KIX-KOM

‘n Nuwe jaar… nuwe dinge… nuwe idees… nuwe moontlikhede… nuwe inspirasie en nuwe motivering. Ook vir ons betrokkenheid by Kix en Sonstraaltjies. Mag die inspirasie van die Heilige Gees jou vanjaar help om toegewyd te wees in jou bediening aan die jeug. Hulle is immers ons toekoms.

Die Kix-pirasie (‘n Kix-nuutskepping van Kix en inspirasie) onderaan hierdie bladsy kan gebruik word aan die begin van elke kwartaal om leiers/leidsters toe te rus.

Nadat ons die afgelope drie jaar die Bybel chronologies deurgewerk het met “God se groot storie met die mens”, het ons vanjaar egter ‘n nuwe invalshoek. In die eerste kwartaal (hierdie uitgawe van Kix.Kom) kyk ons na Vreemde Vroue stories; in die tweede kwartaal gaan ons hoor van ‘n Paar Prettige Profete stories; in die derde kwartaal hoor ons ‘n klompie Snaakse Dierestories en  in die laaste kwartaal kyk ons na ‘n paar Crazy Kinderstories. Klink interessant, nè?

Vanjaar gaan ons ver, ja regtig baie ver, betrokke wees met ons projek. Missie Japan is ‘n organisasie van ons kerk wat al langer as 45 jaar betrokke is in Japan (www.missiejapan.co.za). Deur ons projek “Jesus vir Japan” wil ons saam met hulle veral uitreik na die jeug van Japan. In ons projekles is baie inligting, asook die fondsinsamelingsmetode. Verder is daar by elke ontmoeting eers ‘n stukkie “spioentyd” waar ons meer oor Japan uitvind op ‘n baie interessante manier.

Indien jy nuut is by Kix of Sonstraaltjies en enigiets wil weet, skakel gerus die Jeugkantoor (021 808 9050).

Ons nooi jou nou al uit na ons groot Kinderbedieningskonferensie “Toegerus vir die Toekoms” op 11 en 12 September 2018. Hierdie is die een geleentheid vanjaar wat jy nie mag misloop nie! Teken solank die datums in jou dagboek aan; ons sal in volgende kwartaal se Kix.Kom al die inligting hê.

Mag die Here jou in 2018 op ‘n besondere manier gebruik in die kinderbediening!

Jeugkantoor info:

e-pos: jeug@sun.ac.za

telefoon: 021 808 9050

Kix Koester Kinders – tweede kwartaal

Written by webmaster on . Posted in KIX-KOM

Ons is so opgewonde oor die eerste kwartaal!! Die Nuwe Testament ontmoetings het tot heerlike byeenkomste gelei. Ons was ook baie opgewonde om te hoor hoe verskillende skole en kerke die Kix-materiaal gebruik. Enigiemand is welkom om ‘n Kix-groep by ‘n nasorg, gemeenskapsaal of kerk te begin. Die volledige inligting oor hoe om dit te doen en hoe die materiaal werk is ook aanlyn beskikbaar.

Hierdie jaar se projek, “Kix Koester Kinders”, fokus op die ondersteuning van voorskoolse kinders plaaslik asook die werk wat in Malawi in kleuterskole gedoen word. Ons is so opgewonde oor die terugvoer wat ons reeds ontvang van Kix-groepe wat geld insamel – die Kix-kinders is vol entoesiasme om die skryfbehoefte “mini’s” bymekaar te maak!

Kontak gerus die Jeugkantoor vir enige navrae.

e-pos: jeug@sun.ac.za

telefoon: 021 808 9050

Projek 2017: Kix Koester Kinders

Written by webmaster on . Posted in KIX-KOM

KIX moedig kinders deurentyd aan om ook ‘n omgee vir die wêreld te ontwikkel. Daarom is daar ook elke jaar ‘n na-buite gerigte projek wat deur al die KIX-groepe saam ondersteun word. Die KIX-projek fokus hierdie jaar op die ondersteuning van vroeë kinderontwikkeling (VKO) en word genoem “KIX Koester Kinders”. Daar is twee bene – ‘n sending been en ‘n plaaslike been.

1.  Die sending been

Die idee is dat julle as groep deur die jaar geld insamel vir skryfbehoeftes vir die 5 behoeftige kleuterskole in Malawi met wie KIX ‘n verhouding het. Die kinders in jou KIX-groep raak op dié manier bewus van ‘n ander land, kultuur en taal en hulle leer hoe God wêreldwyd vir sy kinders sorg. Ons sal al die inligting oor hierdie deel van die projek verskaf.

Stap 1: Maak die kinders bewus van die projek en opgewonde om ‘n verskil te maak

Stap 2: Deel gereeld inligting (foto’s en stories) oor die Malawi créches.

Stap 3: Leer saam die woordjies in Chichewa.

Stap 4: Besluit hoeveel jul wil insamel en gebruik die skryfbehoefte handwerk items as motivering. (Sien bl. XXXX vir die besonderhede.) Maak dit ‘n groeppoging en hou die kinders weekliks op hoogte. Julle kan selfs jul gemeentes motiveer om ook by te dra.

2.  Die plaaslike been

Dit sal goed wees om egter ook in jou eie gemeenskap (of naby aan julle) ‘n plaaslike inisiatief te ondersteun. Wat kan julle doen?

Stap 1: Dink aan ‘n plek wat babas of klein kinders in jul gemeenskap versorg. (Kliniek, hospitaal, kinderhuis, sopkombuis, plek van veilige bewaring, pleegouers, kango-ouers, ens.)

Stap 2: Identifiseer ‘n behoefte waarmee jul kan help (dalk speelgoed of klere insamel, kaartjies maak, speel met kinders of gebed).

Stap 3: Deel inligting en foto’s met jou KIX-groep en bid vir hulle. (Onthou om ook terselfdertyd vir die kindertjies van die Malawi-been van ons projek te bid.)

Stap 4: Reël ‘n KIX-uitstappie om hulle te gaan besoek.